"Ronaldinyonun Bakıya səfərini bir müddətdir planlaşdırırdıq. Bu gün imkan oldu. Çox sevinirik ki, Bakıya səfər etdi. Məqsəd Ronaldinyo akademiyasının açılmasıdır. Qəbələdə də belə bir akademiya olsa da, Bakıda da yaradılmasını məqsədəuyğun saydıq. Ümidvarıq ki, bu akademiya gənclərin futbola maraqağını artıracaq. Bundan başqa Ronaldinyo öz fəlsəfəsini quracaq, şəxsən iştirak edəcək".
Sportnet.az-ın məlumatına görə, bunu "Qəbələ"nin prezidenti Tale Heydərov braziliyalı futbolçu Ronaldinyonun Bakıya səfərinə həsr olunmuş mətbuat konfransında deyib.
O bildirib ki, skademiyanın paytaxtda harada yerləşəcəyi hələ məlum deyil: "Bununla bağlı danışıqlar aparacaq və qərar verəcəyik. AFFA bizə dəstək verəcəyinə söz verib. Bu akademiyanın Qəbələdə olmasına ehtiyac yoxdur. Orada infrastruktur olsa da, insanların yaşamaları çətindir. Ona görə də Bakıda açırıq ki, uşaqlar valideynlərindən kənarda qalmasın, məşq edib evlərinə getsinlər. Bakıda akademiya yaratmaq istəyimiz Ronaldinyo akademiyası ilə eyni vaxta düşdü. İstərdik ki, uşaqlar 9 yaşdan başlayaraq, müxtəlif yaş qrupları üzrə çempionatlarda iştirak etsinlər. Bu, uşaqlar arasında rəqabəti gücləndirər. "Qəbələ"nin azyaşlıları özlərinə rəqib tapmaqda çətinlik çəkirlər. Ona görə də belə akademiyanın yaradılması yaxşı olardı. Bakı Olimpiya Stadionunda da açmaq olar. Amma bunun üçün bir neçə məşq meydanı lazımdır. Hər halda bu stadiondan da yararlanmaq olar".
Heydərov Ronaldinyonun Bakıya gəlişinin böyük marağa səbəb olduğunu bildirərək, onun "Qəbələ"də çıxış etməsinin nə dərəcədə mümkünlüyündən də danışıb: "Bu sualı onun özünə verərdiniz. Əlbəttə, belə səviyyəli futbolçunun Bakıya gəlməsi azarkeş marağına səbəb ola bilər".
