"Barselona"nın argentinalı futbolçusu Lionel Messi UEFA tərəfindən fərqləndirilib. Sportnet.az-ın məlumatına görə, 29 yaşlı hücumçu Çempionlar Liqasında III turunun oyunlarından sonra həftənin ən yaxşı futbolçusu seçilib.
Messi UEFA-nın rəsmi saytında keçirilən sorğuda səslərin 38 faizini toplayaraq qalib olub. O, Riyad Marez ("Lester Siti", 20 faiz) ilə Pyer-Emerik Obameyanqı ("Borussiya", Dortmund, 15 faiz) qabaqlayıb. Sonrakı yerləri Məsut Özil ("Arsenal", 13 faiz), Canluicci Buffon ("Yuventus", 11 faiz), Anhel Di Mariya (PSJ, 4 faiz), Yannik Ferreyra-Karrasko ("Atletiko", 4 faiz) və Samir Nəsri ("Mançester Siti", 4 faiz) tutub.
Xatırladaq ki, UEFA-da Avropa Liqası ilə bağlı səsvermədə "Qarabağ"ın legioneri Dani Kintana həftənin ən yaxşı futbolçusu seçilib. Ancaq 29 yaşlı ispan yarımmüdafiəçi məşhur həmkarından az qala 2 dəfə çox - 68 faiz çox səs toplayıb.
