Sabah Azərbaycan Premyer Liqasında IX tura 1 oyunla start veriləcək. Sportnet.az-ın məlumatına görə, əyalətdə keçiriləcək yeganə qarşılaşma Gəncədə olacaq.
"Kəpəz" onun uçün uğursuz rəqiblərindən olan "İnter"i qəbul edəcək. Belə ki, Gəncə təmsilçisi "bankirlər"i 10 oyundur məğlub edə bilmir və sonuncu qələbəsini 6 il öncə evdə qazanıb. Əslində, Şahin Diniyevin komandası ilk dövrədə səfərdə əzmkar qələbəyə çox yaxın olsa da, Ruslan Abışov son dəqiqələrdə vurduğu qolla buna imkan vermədi.
Tur bu dəfə 3 gündə keçiriləcək ki, Avroliqadakı təmsilçilərimiz son gündə oynayacaqlar. Bundan 1 gün öncə isə AZAL-la "Zirə"nin Şüvəlanda qarşılaşması olacaq. Meydan sahibləri turnir cədvəlində son pillənin sahibi kimi ilk qələbəsini zirəlilər üzərində qazanmağa çalışacaq. Özü də bu komandaların görüşündə meydan sahibinin uduzmamağı diqqət çəkir. Deməli, statiktika qırılmazsa, AZAL ən azı 1 xal qazanacaq.
Avropa Liqasındakı təmsilçilərimiz bu turda səfərdə çıxış edəcəklər. "Qəbələ" ilk dövrədə evdə çətinliklə məğlub etdiyi "Sumqayıt"ın qonağı olacaq. Liderə həmin oyunda son 5 dəqiqədə etdiyi dublla qələbə qazandıran fransalı hücumçu Baqali Dabo bu dəfə zədəli olduğundan sumqayıtlılara qarşı oynamaycaq.
Sözsüz ki, turun mərkzi oyunu "Neftçi" - "Qarabağ" matçı olacaq. 1992-ci ildən bütün milli çempionatlarımızda iştirak edən komandalar tarixi derbidə qarşılşacaqlar. Bu, çempionatda 66-cı matç olacaq. "Neftçi" "Bakcell Arena"ya qayıdaraq cari mövsümdə ilk dəfə öz stadionunda oynayacaq. Bu, eyni zamanda Premyer Liqanın cari mövsümündə həmin stadionda ilk matç olacaq. "Neftçi"nin baş məşqçisi Elxan Abdullayev bir vaxtlar çalışdırdığı "Qarabağ"la üzləşəcək. Onun komandası doğma stadionuna qayıdışını qələbə ilə qeyd etməyə, autsayderlər sırasından çıxmağa, rəqibi isə "Qəbələ" ilə çempionluq uğrunda mübarizədə xal fərqinin artmamasına çalışacaq.
Azərbaycan Premyer Liqası, IX tur
23 oktyabr
14:30. "Kəpəz" - "İnter"
Gəncə. Şəhər stadionu
İlk dövrədəki oyun - 2:2
24 oktyabr
16:00. AZAL - "Zirə"
Bakı. "AZAL Arena" stadionu
İlk dövrədəki oyun - 1:3
25 oktyabr
16:00. "Sumqayıt" - "Qəbələ"
Sumqayıt. "Kapital Bak Arena" stadionu
İlk dövrədəki oyun - 0:2
19:00. "Neftçi" - "Qarabağ"
Bakı. "Bakcell Arena" stadionu
İlk dövrədəki oyun - 0:3
