"Barselona" İspaniya çempionatının IX turunda "Valensiya"ya 3:2 hesabı ilə qalib gəldiyi səfər matçından ciddi itki ilə ayrılıb.
Sportnet.az-ın məlumatına görə, komandanın kapitanı Andres İnyestanın matçın 14-cü dəqiqəsində rəqib futbolçu Entso Pereslə toqquşmadan sonra aldığı zədənin ciddi olduğu aşkarlanıb.
Klubun rəsmi saytı İnyestanın sağ dizində yan əzələ bağlarından ciddi xəsarət aldığını açıqlayıb. Bu isə təcrübəli futbolçunun 6 həftədən 8 həftəyədək yaşıl meydanlardan kənarda qalmalı olması deməkdir. Nəticədə 32 yaşlı yarımmüdafiəçi həm "Barselona"ya, həm də İspaniya millisinə uzun müddət kömək edə bilməyəcək, belə gedişlə ili vaxtından əvvəl başa vurmalı olacaq.
Qeyd edək ki, Andres İnyesta meydanı ağlayaraq xərəkdə tərk etməli olub.
