21:15. İsveçrənin Sürix şəhərində 2014-cü ilin yekunlarına əsasən, mükafatlandırma mərasimi başlayıb. Sportnet.az-ın məlumatına görə, Qala gecədə çıxış edən FİFA prezidenti Yozef Blatter dünyada 1,2 milyard insana 300 milyonluq futbol ailəsi ilə qovuşdularını bildirib.
O, hər kəsi sülhə çağırıb. Blatter mərasimdə ilk dəfə iştirak edən ölkə prezidenti - İsveçrənin rəhbəri Didye Burkhalteri, eləcə də Beynəlxalq Olimpiya Komitəsinin prezidenti Tomas Baxı təqdim edib.
21:27. Mərasim Fransanın paytaxtı Parisdə baş vermiş terror aktının qurbanlarına dəstək olaraq, "Je suis Charli" şüarı altında keçirilir.
21:29. 2014-cü ildə keçirilmiş kişilər və qadınlar arasında dünya çempionatından süjet nümayiş etdirilir.
21:32. Kişi və qadınlar arasında ən yaxşı futbolçu olmağa namizəd olan 6 şəxs səhnəyə dəvət olunur.
21:33. Ferents Puşkaş mükafatına namizəd olan 10 ən gözəl qol nümayiş etdirilir.
21:36. İtaliya milli komandasının sabiq futbolçusu Alessandro Del Pyero səhnəyə dəvət olunur və simvolik komandaya düşən 11 futbolçu açıqlanıb:
Manuel Noyer (Almaniya) - Filip Lam (Almaniya), Serxio Ramos (İspaniya), Tyaqo Silva, David Luis (hər ikisi Braziliya) - Andres İnyesta (İspaniya), Toni Kros (Almaniya), Anxel Di Mariya (Argentina) - Aryen Robben (Hollandiya), Kristiano Ronaldo (Portuqaliya), Lionel Messi (Argentina). Onlar səhnəyə dəvət olunaraq, mükafatlandırılırlar.
21:51. Yozef Blatter səhnəyə çıxaraq, FİFA prezidenti mükafatının sahibini yaponiyalı sabiq futbolçu və jurnalist Hiroşi Kaqavaya təqdim edir.
22:00. Ötən ilin "Qızıl top" sahibi Kriştianu Ronaldu səhnəyə dəvət olunur. Onun haqqında "Real Madrid"in baş məşqçisi Karlo Ançelotti və ispaniyalı tennisçi Rafael Nadalın fikirləri səsləndirilir. Ronaldu isə ötən ilin ən duyqusal anı kimi "Qızıl top"u almasını açıqlayır.
22:06. Almaniyalı Ralf Kellermann ("Volfsburq", Almaniya) qadınlar, Yoahim Löv (Almaniya millisi) kişilərdən ibarət komandaların baş məşqçiləri arasında ən yaxşı seçilirlər. Kellermann bir neçə gün öncə "Volfsburq"un avtomobil qəzasında dünyasını dəyişən futbolçusu Junior Malandanın xatirəsini yad edib. Löv isə aldığı mükafatı Almaniyanın dünya çempionu olmasında rolu olan bütün məşqçilərin əməyinin nəticəsi kimi dəyərləndirib.
22:15. Qadın futbolçular arasında "Qızıl top"un 5 qat sahibi, braziliyalı Marta haqda süjet nümayiş etdirilir.
22:17. UEFA-nın I vitse-prezidenti Şenes Erzik və FİFA-nın baş katibi Jerom Valke səhnəyə dəvət edilirlər. "Fair play" mükafatının sahibi açıqlanır. Həmin mükafat dünya çempionatında yardımçı olan minlərlə könüllü adından müxtəlif yaş kateqoriyasından 5 nəfərə təqdim olunur.
22:25. "Qızıl top"a digər namizəd və əvvəllər bu mükafatı 4 dəfə əldə etmiş Lionel Messi səhnəyə dəvət edilir. Onun barəsində "Barselona"nın baş məşqçisi, aralarında soyuqluq olduğu bildirilən Luis Enrikenin və argentinalı sabiq komanda yoldaşı Pablo Aymarın fikirləri səsləndirilir.
22:30. DÇ-2014-dən kadrlar nümayiş etdirilir.
22:32. Yoahim Löv və Almaniya yığmasının kapitanı Filip Lam Dünya Kuboku ilə birgə səhnəyə dəvət olunurlar.
22:35. Qadınlar arasında ən yaxşı futbolçu adına növbəti namizəd - Ebbi Vambax (ABŞ) haqda süjet nümayiş etdirilir.
22:37. Səhnə musiqiyə verilir.
22:42. Dünyanın ən yaxşı qadın futbolçusu adına namizədlər səhnəyə dəvət olunur. 2015-ci ildə qadınlar arasında Kanadada dünya çempionatının keçiriləcəyi xatırladılır.
22:45. Fransa yığmasının sabiq futbolçusu, dünya çempionu Kristian Karambö səhnəyə dəvət edilir. Ebolaya qarşı futbolçular adından mesajın verildiyi videoçarx nümayiş etdirilir. Ferents Puşkaş mükafatının sahibi Xames Rodriges səsvermə yolu ilə ən yaxşı qolun müəllifi kimi mükafatlandırılır.
22:50. "Qızıl top" mükafatına daha bir namizəd - Manuel Noyer səhnəyə dəvət olunur. Onun barəsində "Bavariya"nın baş məşqçisi Xosep Qvardiola və basketbol üzrə dünya çempionu Dirk Novitskinin fikirləri səsləndirilir.
22:55. Ən yaxşı qadın futbolçunun adı açıqlanır. Bu ada Nadin Kessler (Almaniya) layiq görülür.
22:59. Nəhayət, kişilər arasında dünyanın ən yaxşı futbolçusunun açıqlanma məqamı yetişir. Bu məqsədlə fransalı sabiq dünya çempionu Tyerri Anri səhnəyə dəvət olunur. Namizədlərdən hazırlanan videosüjet nümayiş etdirilir. Mükafatı təsis edən "France Football" jurnalı təmsilçisi və FİFA prezidenti Yozef Blatter səhnəyə çıxır. Anri qalibi açıqlayır: Kriştianu Ronaldu!
23:05. Ronaldunun oğlu səhnəyə çıxır. Bütün qaliblər səhnəyə dəvət edilir və mərasimin başa çatdığı elan olunur.
------------------------------------------------------------------------------------------------------------------------------
