"Qarabağ”ın fransalı yarımmüdafiəçisi Abdullah Zubir UEFA Avropa Liqasının ikinci təsnifat mərhələsində MOİK-ə qarşı keçirilən ilk oyundan sonra komandasının növbəti mərhələyə yüksəlmək üçün səfərdə qələbə qazanmağa çalışacağını bildirib.
Sportnet.az xəbər verir ki, Bakıda qolsuz heç-heçə ilə başa çatan qarşılaşmanı dəyərləndirən 34 yaşlı futbolçu oyunun çətin keçdiyini söyləyib.
“Qalib gəlmək bizim üçün çox vacib idi. Güclü rəqibə qarşı çətin oyun keçirdik. Yaratdığımız qol imkanlarından yararlana bilmədik. Bununla belə, komandamız ümumilikdə inamlı oyun nümayiş etdirdi. Qarşıda bizi daha bir vacib görüş gözləyir. Səfər matçına daha yaxşı hazırlaşmalı və oradan qələbə ilə dönməyə çalışmalıyıq. Asan olmayacağını bilirik. Lakin əsas məqsədimiz növbəti mərhələyə yüksəlməkdir”, – deyə A.Zubir vurğulayıb.
Fransalı yarımmüdafiəçi cavab görüşünə maksimum motivasiya ilə hazırlaşdıqlarını da qeyd edib.
“Hazırda bütün diqqətimizi səfər oyununa yönəltmişik. Düşünürəm ki, azarkeşləri maraqlı qarşılaşma gözləyir. Hər iki komanda keyfiyyətlidir. Daha yaxşı hazırlaşıb qələbə qazanmağa çalışacağıq. Bu, bizim əsas hədəfimizdir. Səfər matçının necə keçəcəyini indidən söyləmək çətindir. Ancaq bizi ağır və gərgin mübarizənin gözlədiyini bilirik”, – deyə o əlavə edib.
Qeyd edək ki, komandalar arasında cavab oyunu bir həftə sonra Bolqarıstanda təşkil olunacaq.
