"Neftçi"nin Avropa Liqasının II təsnifat mərhələsində rəqibi olan Makedoniyanın "Şkendiya" klubunun hücumçusu Besart İbraiminin Sportnet.az-a müsahibəsi
- Bakıdakı matçın nəticəsi sizi razı saldı?
- Fikrimcə, qalib gəlsəydik, razı qalardıq. Hələ oyunun əvvəlində yüzfaizli qol imkanımız vardı. Ondan istifadə etməli idik. Ancaq bu, futboldur, belə şeylər olur. Bizi qarşıda cavab oyunu gözləyir. "Neftçi" ilə ev matçımız tam başqa olacaq. İlk oyunu unudub, həmin qarşılaşmanı düşünməliyik.
- Səfərdə mütləq qələbə qazanmaq fikrində idiniz, yoxsa heç-heçə də sizə sərf edirdi?
- Biz meydana qələbə üçün çıxmışdıq və buna nail olmaq istəyirdik. Yaxşı qol imkanlarımız vardı. Bunları dəyərləndirməyimiz lazım idi.
- Hesab oyuna görə oldu, yoxsa?
- Bizim qələbə şansımız daha çox idi. Bu da qol imkanlarımızın rəqibdən çox olmasına görə idi.
- Hər halda, rəqib meydanında 0:0 pis nəticə deyil...
- Əlbəttə. Üstəlik, güclü rəqiblə oynayırdıq. "Neftçi" yaxşı komandadır. Ancaq Skopyedə çətin olacaq.
- Niyə ki? Evdə oynayacaqsınız...
- Düzdür. Ancaq həmin oyunda artıq heç-heçə ola bilməz. Qalib gəlməliyik. Qol vursaq, buna nail olacağıq və onda mərhələni keçəcəyik.
- "Neftçi" evdə qol buraxmadığından ona mərhələ keçmək üçün istənilən qollu heç-heçə sərf edir. Sizə ona görə çətin ola bilər ki, rəqib 1 qol vursa, siz onun əvəzini çıxmaq üçün artıq 2-ni vurmalı olacaqsınız...
- Düzdür. Bunun üçün müdafiədə etibarlı oynamalı, bütün komanda olaraq konsentrasiya olmalıyıq. Hesab edirəm ki, qol vursaq, üstünlüyü ələ keçrib sonda qalib olacağıq.
- "Neftçi"də hansı futbolçunu daha çox bəyəndiniz?
- Yaxşı futbolçlar çoxdur. Hücumda da, digər mövqelərdə də.
- Rəqibin heyətində bir futbolçu sizə çox tanış idi. Bu, həmyerliniz, mərkəz müdafiəçisi Vanço Şikov idi...
- Biz bir-birimiz yaxşı tanıyırıq. Şikov peşəkar futbolçudur, yaxşı oyun göstərdi. Düşünmürdük ki, o, bizə güzəştə gedəcək.
- Oyundan öncə bu duellə bağlı söhbətiniz olmuşdu?
- Yox. Vançoyla matçda qarşılaşıb söhbətləşdik.
- Növbəti mərhələyə çıxmağa kim daha şanalsı sayırsınız?
- Bizim şansımız daha çoxdur. Çünki evdə oynayacağıq. Azarkeşlərimiz bizə dəstək olacaqlar.
