Bu gün "Qarabağ" komandası Çempionlar Liqasında növbəti matçına çıxıb. Sportnet.az-ın məlumatına görə, Ağdam təmsilçisi III təsnifat mərhələsinin cavab oyunu çərçivəsində Moldovanın "Şerif" kollektivinin qonağı olub.
Tiraspolda baş tutmuş görüş Qurban Qurbanovun baş məşqçisi olduğu komanda üçün tarixi qələbə ilə yekunlaşıb. Bakıda keçirilmiş ilk qarşılaşmada rəqibi ilə qolsuz bərabərə qalan "Qarabağ" səfərdə qələbəyə nail olub - 2:1. Hər üç qol hissələrin sonlarında vurulub. İlk yarıya əlavə olunmuş dəqiqədə Dino Ndlovu təkbaşına rəqib müdafiəsini yararaq, hesabı açıb. İkinci hissənin sonlarında Miçel Ndlovunun ötürməsindən sonra fərqi artırıq. Yalnız ikinci hissənin uzatma dəqiqələrində "Şerif" təsəlli qolunu vurmağa müvəffəq olub. Rəşad Sadıqovun kobud oyunundan sonra təyin olunmuş penaltini Ziquy Badibanqa qola çevirib.
Beləliklə, "Qarabağ" qitənin ən nüfuzlu klub turnirində pley-off mərhələsinə vəsiqə qazanan ilk Azərbaycan klubu olub. Ağdam təmsilçisi həm də dördüncü dəfə ən azı Avropa Liqasının qrup mərhələsinə vəsiqəni təmin edib. Çempionlar Liqasının "pley-off" mərhələsini də adlayacağı halda, "Qarabağ" Azərbaycanı ən nüfuzlu klub turnirinin qrup mərhələsində təmsil edəcək ilk klub olacaq.
Çempionlar Liqası
III təsnifat mərhələsi, cavab oyunu
1 avqust
21:00. "Şerif” (Moldova) – "Qarabağ” (Azərbaycan) - 1:2
Qollar: Ziquy Badibanqa, 90+4-penalti ilə - Dino Ndlovu, 45+3. Miçel, 86
Baş hakim: Roy Reynşreyber
Yan xətt hakimləri: Amihay Yehoşua Mozes, Dan UçeniçDördüncü hakim: Daniel Bar Natan (hamısı İsrail)
UEFA nümayəndəsi: Edqars Pukinsks (Latviya)
Hakim-inspektor: Paulius Malzinskas (Litva)
Tiraspol. "Şerif” stadionu
İlk oyun – 0:0.
Tiraspoldakı "Şerif Arena"da oyun başladı. Havanın temperaturu 33 dərəcədir.
Oyun başladı
Oyunun əvvəli qarşılıqlı kobudluqlarla müşayiət olunur.
6` Vitalie Damaşkan İbrahim Şehiçlə təkbətək çıxıb onu aldatsa da, iti bucaqdan fərqlənə bilmir.
10` Kristiano da Silva Leyte "Qarabağ"ın cərimə meydançasına daxil olsa da, Şehiç yaxşı oynayır
13` Şehiç bu dəfə Yosip Brezovetsin Vitalie Damaşkana ötürməsinin qarşısını alır.
16` "Qarabağ" ilk künc zərbəsi qazandı
20. Mateo Suşiçin uzaqdan zərbəsini Şehiç tutdu.
21` Badibanqanın təkbaşına irəlilədikdən sonra Şehiç onun qarşısını alır. Bu, "Şerif"in ilk real qol imkanı idi.
22` Maksim Medvedev zədələnərək, həkimlərin müşayiəti ilə meydanı tərk edir...
23` Xoşbəxtlikdən, Medvedevin zədəsi ciddi deyil və o, meydana qayıdır...
26` Şehiç cərimə zərbəsindən sonra topun qapıya getməsinin qarşısını aldı
28` Badibanqanın təhlükəli hücumunun qarşısını "Qarabağ" müdafiəçiləri aldı
28` Gerrye hakimlə mübahisəyə görə sarı vərəqə alır. Oyunda ilk rəsmi xəbərdarlıq...
31` Medvedev oyuna davam edə bilmir. O, Yakub Jezniçakla əvəzlənir...
33` Damaşkanın o qədər də təhlükəli olmayan zərbəsini Şehiç dəf edir...
35` "Qarabağ"ın daha bir futbolçusu sarı vərəqə alır. Miçel rəqib komandanın oyunçusuna qarşı kobudluq etdiyi üçün cəzalanır.
38` "Şerif"dən ilk sarı vərəqə. Dino Ndlovunun hücumunun qarşısını kobudluqla aldığı üçün Vyaçeslav Posmak cəzalanır.
39` Qara Qarayevin yerinə yetirdiyi cərimə zərbəsindən sonra top qapı çərçivəsindən kənara gedir.
40` Miçel də zədələnir. Amma o, oyuna davam edə bilir.
42` Vild-Donald Gerye qola xeyli yaxınlaşdı. Onun zərbəsini "Şerif"in qapıçısı Zvonimir Mikuliç çətinliklə dəf etdi.
44` Damaşkan Jezniçaka qarşı kobudluğa görə sarı vərəqə alır.
45` Oyunun ilk yarısına 5 dəqiqə əlavə olunur.
45+1` Mahir Mədətov Oliveyraya qarşı kobudluq edir.
45+31 QOOOOLLLL. Dino Ndlovu uzun reyd etdikdən sonra topu "Şerif"in qapısından keçirdi.
"Qarabağ" 1:0 hesabı ilə öndə. Oyunda əlavə vaxt olmayacaq. Çünki ilk matç qolsuz yekunlaşıb. "Qarabağ"a səfərdə qollu heç-heçə də kifayət edir. "Şerif" isə ən azı 2 qol vurmalıdır.
İlk yarı başa çatdı.
46` İkinci hissə başladı.
47` Yosip Brezovets Qara Qarayevə qarşı kobudluğa görə sarı vərəqə alır
48` Kristiano da Silva Leytenin təhlükəli zərbəsini Şehiç dəf etdi
53` Badibanqanın başla təhükəli zərbəsi qapının yanından keçdi
54` Künc zərbəsindən sonra Brezovetsin zərbəsini Şehiç dəf etdi.
56` Siril Bayala təhlükəli hücumu uğursuzluqla yekunlaşdırır
57` Şehiç topu oyuna gec daxil etdiyi üçün sarı vərəqə alır
60` "Qarabağ"da növbəti əvəzləmə. Mahir Mədətovun əvəzinə Əfran İsmayılov oyuna daxil olur
61` "Şerif"də əvəzləmə: Jeremi de Noyyerin əvəzinə Stefan Muqoşa meydana daxil olur
63` Siril Bayala "Şerif"in təhlükəli hücumundan yararlana bilmir. Top onun ayağından sürüşür
69` Damaşkan təhlükəli vəziyyətdən fərqlənə bilmir
72` Riçard Almeydanın endirdiyi zərbə Mikuliçin qucağına tuş gəlir
73` Ansi Aqolli Bayalaya qarşı kobudluğa görə sarı vərəqə aldı
74` "Şerif"in təhlükəli hücumundan Posmak yararlana bilmir.
"Şerif"in hücumları faydasızdır.
80` Ndlovu növbəti qola xeyli yaxın oldu. Amma Mikuliç topun tora daxil olmasına imkan vermədi
84` Şehiç Badibanqanın təhlükəli zərbəsini dəf etdi
86` QOOOOLL!
Miçel Ndlovunun ötürməsindən sonra "Qarabağ"ın ikinci qoluna imza atdı
89` Ağabala Ramazanov Dino Ndlovunu əvəzlədi.
90` Hakim oyuna 3 dəqiqə əlavə etdi.
90+4` Rəşad Sadıqov kobudluğa görə "Qarabağ"ın qapısına penalti təyin olundu. Sadıqova sarı vərəqə göstərildi. Badibanqa zərbəni dəqiq yerinə yetirdi.
Oyun başa çatdı. "Qarabağ" 2:1 hesablı qələbə sayəsində tarixində ilk dəfə Çempionlar Liqasının "pley-off" mərhələsinə yüksəldi və ardıcıl 4-cü dəfə ən azı Avropa Liqasının qrup mərhələsinə vəsiqəni təmin etdi.
