Türkiyənin Antalya şəhərində təlim-məşq toplanışında olan "Qəbələ” yoxlama oyunu keçirib. 2018-ci ilin ilk sınağında rəqibi "Akhisar Bələdiyyəspor” olub.
Sportnet.az-ın məlumatına görə, qarşılaşma Bələkdəki "Rixos Premium” otelinin meydançasında baş tutub. "Qırmızı-qaralar” Türkiyə Superliqasında çıxış edən rəqiblə görüşə aşağıdakı start heyəti ilə başlayıb: Murad Popov, Qismət Alıyev, Voislav Stankoviç, Ürfan Abbasov, Ruslan Qurbanov, Asif Məmmədov, Cavid Hüseynov, Stiven Monroz, Filip Ozobiç, Baqali Dabo, Famussa Kone.
Maraqlı və bərabər mübarizə şəraitində keçən oyunda hesab 17-ci dəqiqədə açılıb.
Akhisar təmsilçisinin legioneri Serjinyo fərqlənib. Qarşılıqlı hücumlarla davam edən ilk yarıda hesab dəyişməyib. Matçın fasiləsində hər iki komandanın heyətində oyunçu dəyişiklikləri gerçəkləşib.
Matçın gedişində "Qəbələ”də Vitali Vernidub, Elvin Camalov, Elvin Məmmədov, Təmkin Xəlilzadə, Kalke Vercilio, İlqar Qurbanov, Yusif Nəbiyev, Alen Askerov, Hacıağa Hacılı və Rasim Ramaldanov da oyuna daxil olublar. İkinci hissənin əvvəllərində "Qəbələ” qol sevinci yaşayıb. Filip Ozobiç 57-ci dəqiqədə hesabda tarazlıq yaradıb. Bu, həm də matçın yekun nəticəsi olub.
Beləliklə, 2017-2018-ci illər mövsümünün ikinci yarısına hazırlıq prosesində baş tutan ilk yoxlama oyunu 1:1 hesabı ilə başa çatıb.
Yoxlama oyunu
10 yanvar
18:00. "Akhisar Bələdiyyəspor” (Türkiyə) – "Qəbələ” (Azərbaycan) 1:1
Qol: Serjinyo,17 - Ozobiç, 57
Antalya. Bələk. "Rixos Premium” otelinin meydançası
"Qəbələ"nin start heyəti: 35. Murad Popov, 8. Qismət Alıyev, 3. Voyislav Stankoviç, 34. Ürfan Abbasov, 10. Ruslan Qurbanov, 11. Asif Məmmədov, 14. Cavid Hüseynov, 28. Stiven Monroz, 18. Filip Ozobiç, 9. Baqali Dabo, 45. Famussa Kone
Qeyd edək ki, bu, qış fasiləsində Azərbaycan klubunun iştirakı ilə ilk yoxlama oyunu olacaq.
