"Hazırlıq prosesi yaxşı keçir. Qəbələdə baş tutan ilk mərhələdə fiziki hazırlıq üzərində çalışmışdıq. Sloveniyada isə daha çox toplu məşqləri gerçəkləşdiririk. Vaxt azlığı və heyətdəki dəyişiklikləri nəzərə alsaq, üzərimizdə çox işləməliyik. İlk yoxlama oyununda "Kukesi” ilə qarşılaşdıq. Düzdür, hər şey tam istədiyimiz kimi alınmadı. Çünki biz daha yaxşı oynamalıyıq. Lakin Albaniya təmsilçisi ilə matç ilk görüşümüz olduğundan qarşılaşmanı müsbət dəyərləndirərdim”.
Sportnet.az xəbər verir ki, bunu "Qəbələ"nin futbolçusu Asif Məmmədov Sloveniyadakı hazırlıq prosesi və ilk yoxlama matçı barədə klubun rəsmi saytına açıqlamasında deyib.
Təcrübəli yarımmüdafiəçi baş məşqçi dəyişikliyi barədə fikirlərini də açıqlayıb. O bildirib ki, uzun müddət komandada çalışan Sənan Qurbanovun baş məşqçi kimi uğurlar qazanmasında bütün komanda pay sahibi olacaq: "Qurbanovla neçə müddətdir birlikdə çalışırıq. Necə mütəxəssis olduğuna bələdik. Daim öz üzərində işləyir. Gənc olmasına baxmayaraq təcrübəli mütəxəssislərlə çalışmaqla böyük təcrübə qazanıb. Bütün "Qəbələ” camiəsinin ona böyük ümidləri var. Biz futbolçular da uğur qazanmaqda ona yardım etməliyik. Nəticədə bu, komandanın uğuru olacaq”.
Məmmədov Avropa Liqasının püşkatmasını dəyərləndirib, "Qəbələ”nin I təsnifat mərhələsində Lüksemburq "Proqres”i ilə dueldəki şanslarından da danışıb: "Əslində, mümkün 5 rəqib arasında ciddi fərq yox idi. Çünki Avroliqada zəif rəqib olmur. Həm "Qəbələ”, həm də "Proqres” yay fasiləsindən sonra ilk rəsmi matçına çıxacaq. Buna görə də rəqiblərin ikisinə də çətin olacaq. Hazırda şanslar 50-nin 50-yədir. Lakin bizim Avropa təcrübəmiz daha çoxdur. Çalışacağıq ki, Lüksemburq təmsilçisini mübarizədən kənarlaşdıraq”.
Qeyd edək ki, "Qəbələ" "Kukesi" ilə 1:1 hesablı heç-heçə edib. "Proqres"lə ilk oyun iyulun 12-də Qəbələdə, cavab görüşü iyulun 19-da Düdelanj şəhərində keçiriləcək.
