Kosovonun paytaxtı Priştina şəhərində 15 və 17 yaşlı yeniyetmə ağırlıqqaldıranlar arasında Avropa birinciliyi start götürüb. Sportnet.az-ın məlumatına görə, yarışda 40-dək ölkədən 305 atlet (175 oğlan və 130 qız) mübarizə aparır.
Azərbaycan təmsilçilərindən Elşən Məmmədov artıq körpücük üzərinə çıxıb. O, yaşı 15-ə qədər olan atletlərin 50 kq çəki dərəcəsində yarışıb. Lənkəranlı atlet birdən qaldırma hərəkətində 75 kq-ı ram edib və bu hərəkətdə bürünc medal qazanıb. Məmmədov təkanla qaldırma hərəkətində 95 kq-ı başı üzərinə qaldıra bilib və bu hərəkətdə 4-cü yeri tutub.
Cəmi 13 yaşı olan və Avropa birinciliyinin ən gənc atleti olan Azərbaycan təmsilçisi toplam 170 kq (75 kq + 95 kq) nəticə ilə yekun sıralamada bürünc medal qazanıb.
