"Xəzər Lənkəran"ın sabiq baş məşqçisi Mirça Rednik özünə yeni komanda tapıb. Sportnet.az-ın məlumatına görə, 53 yaşlı mütəxəssis Rumıniya "Petrolul"u ilə mövsümün sonunadək müqavilə bağlayıb.
Rəsmi təqdimat mərasimi yanvarın 12-də Ployeşti şəhərindəki "İlie Oana" stadionunda olacaq. Yanvarın 15-də isə "Petrolul" Türkiyənin Antalya bölgəsinə təlim-məşq toplantısına yollanacaq. Hazırlıq prosesi çərçivəsində ilk yoxlama matçı Azərbaycan təmsilçisi "Neftçi"yə qarşı olacaq. Görüş yanvarın 23-də Bakı vaxtı ilə saat 17:00-da "Mardan" İdman Kompleksində baş tutacaq.
Qeyd edək ki, hazırda Rumıniya çempionatında 3-cü pillədə qərarlaşan "Petrolul"un heyətində 2013-cü ilin ilk yarısında azərbaycanlı futbolçu Elhad Nəziri də çıxış edib. Rednik isə bu komandaya ikinci dəfə qayıdıb. O, 2012-ci ilin iyunundan oktyabrınadək bu komandanın sükanı arxasında olub. "Xəzər Lənkəran"a isə rumıniyalı mütəxəssis 2010-cu ilin iyulundan 2011-ci ilin dekabrınadək rəhbərlik edib.
