FIFA prezidenti Canni İnfantino çərşənbə axşamı Los-Ancelesdə keçirilən Dünya Kubokunun ulduzlarla dolu açılış mərasimində şəhərin dünyanın hər yerindən futbol azarkeşləri tərəfindən dolub-daşacağı barədə xəbərdarlıq edib.
Sportnet.az xəbər verir ki, bu həftə keçiriləcək açılış matçları ərəfəsində çıxış edən İnfantino deyib: “Sizə hücumlar ediləcək”.
FIFA prezidenti sözlərinə aydınlıq gətirib: “Sizə bir dəstə barbar hücum edəcək. Amma onlar “xoşbəxt barbarlar” olacaq, narahat olmayın”.
İnfantino turnirin Los-Ancelesi və digər ev sahibi şəhərləri milli rənglərin dənizinə çevirəcəyini, hər yaşdan olan azarkeşlərin köynək geyinərək, bayraqlar daşıyaraq və boyalı üzlərlə gələcəyini bildirib.
“Kişilər, qadınlar, uşaqlar, nənə və babalar - fərqi yoxdur, onların hamısının üzləri ölkələrinin rənglərinə boyanacaq”, - deyə o bildirib.
“Onlar, sadəcə, zövq almaq və əylənmək istəyəcək, çünki Dünya Kuboku ilə buna nail olmaq - dünyanı birləşdirmək istəyirik”.
Amerika Birləşmiş Ştatları, Meksika və Kanadanın ev sahibliyi etdiyi turnir 48 komandanın iştirak etdiyi ilk dünya çempionatıdır. İnfantino bildirib ki, dünya ölkələrinin dörddəbiri meydanda təmsil olunacaq və planetdə milyardlarla tamaşaçı oyunları izləyəcək.
“Bu, sadəcə Dünya Kuboku deyil, tarixdə ən böyük və möhtəşəm FIFA Dünya Kuboku olacaq”, -deyə o əlavə edib.
Los-Ancelesin səkkiz oyuna, eləcə də regionda azarkeş festivallarına və 10 azarkeş zonasına ev sahibliyi etməsi planlaşdırılır.
