"Oyun doğrudan da maraqlı keçdi. Həqiqətən liderlərə yaraşan qarşılaşma idi". Sportnet.az-ın məlumatına görə, bunu "Kəpəz"in baş məşqçisi Şahin Diniyev Azərbaycan Premyer Liqasının XXX turunda evdə "İnter"lə 1:1 hesablı heç-heçə etdikləri oyundan sonra CBC Sport-a deyib.
O bildirib ki, komandası qələbəyə daha yaxın idi: "Birinci hissəni və ikinci hissənin ilk 15 dəqiqəsini çox pis keçirdik. Səbəb axtarmıram, amma komandada fiziki və psixoloji gərginlik var. Onu aradan qaldırmağa çalışdıq. Son 25 dəqiqədə sərgilədiyimiz oyuna görə komandama təşəkkür edirəm. Səhv etməsəydik, məncə, biz 3 xala daha yaxın idik. Hər bir oyunda müdafiəçilərimiz uşaq səhvləri buraxır. Bu da az qollu oyundur. Bir top matçın taleyini həll edir. İrəli baxmaq lazımdır. Uğurlu oyunlarımız hələ qabaqda olacaq".
