"Qələbə üçün hər şeyi etdik. Amma nəsə çatmadı". Sportnet.az-ın məlumatına görə, bunu "Neftçi"nin baş məşqçisi Vəli Qasımov "Zirə" ilə evdə 0:0 hesablı heç-heçə etdikləri Azərbaycan Premyer Liqasının XXXI tur matçından sonra deyib.
Onun fikrincə, komandası qələbə qazanmayıbsa, deməli, nəticə qaneedici deyil: "Zirə" ilk ildir ki, Premyer Liqada çıxış edir. Buna baxmayaraq stabil çıxış edir və ikinci pilləyə layiqli komandadır. 4-cü dəfədir bu komandayla qarşılaşırıq. Qələbə qazanmaq istəsək də, alınmadı. Komanda daxilində inam yoxdur, idman bəxti yoxdur. Bəzi oyunlarda qapımıza iki hücum edilib və qol olub. Amma biz 10-dan artıq hücum qurmuşuq, alınmayıb. Komandada olan inam itib. 7-ci yerdə olan komanda udmaq istəyir. Məsələn, "Zirə" ikinci yerdədir, rahat oyuna çıxır və uduzsa da problem olmur. Ancaq bizim pillədə olan komanda yalnız qələbə haqda düşünür və bu da gərginlik yaradır. Futbolçularla psixoloji baxımdan işlər görülür. Bu komanda oyunudur. Biz həmişə "Qarabağ"ı tərifləyirik. Amma heç kimin yadına düşmür ki, "Qarabağ" neçə ilə bu cür stabil oyuna çatıb. Başqa komandalar da futbolçuların nə qədər aldığını bilmirəm. Hər kəsin öz səviyyəsi var. Mən öz komandamı fikirləşirəm. Bizim futbolçuların istəkləri var, inanıram ki, qalib gələcəyik".
V.Qasımov yükünün çox olduğunu söyləyib: "Yüküm həddən artıq çoxdur. İndi həm idman direktoru, həm də baş məşqçi kimi işləyirəm. Çalışıram ki, az yatım. Hərdən idman edirəm. Komandaya inanıram. İmkan veriblər və mən işləyəcəm. Bir aya Ançelottini də, Mourinyonu da gətirsəniz mümkün deyil. Problem həm oyunçu, həm də baş məşqçidədir. Rəhbərlik də böyük işlər görür. Mən transfer etmirəm. Baş məşqçi oyunçu gətirmək istəsə də, məşqçilərin ümumi rəyi olmasa bu iş görülə bilməz. Mən hər hansı bir futbolçunu izləməyə gedirəmsə, öz fikirlərimi bildirirəm. Hər kəs "hə" dedikdən sonra transfer baş tutur. Bizdə sistem fərqlidir. Vəli Qasımov getsə də struktur var və iş gedir. Messi "Barselona"da getsə də, "Barsa" həminki komandadır".
