"Neftçi"nin baş məşqçisi Elxan Abdullayevin Sportnet.az-a müsahibəsi
- Premyer Liqanın növbəti turunda "Sumqayıt"la oyuna hazırlığınız necə gedir?
- Hər şey qaydasındadır. Plan üzrə məşq edirik. Bütün futbolçular sərəncamımdadır.
- Zədəlilərin vəziyyəti necədir?
- Elşən Abdullayevdən fərqli makedoniyalı müdafiəçi Vançe Şikov artıq komanda ilə birgə hazırlaşır. Rumıniyalı hücumçu Katalin Tira da qrup çalışmalarında iştirak edir. O, xəstələndiyinə görə son oyunda adı heç protokoda yox idi. Artıq tam sağalıb.
- Millimizin sabiq futbolçusu, vaxtilə "Neftçi"də oynayan müdafiəçi Mahir Şükürov da məşqlərinizdə iştirak edir...
- Bəli, yenicə başlayıb. Ancaq Mahir müqaviləyə əsasən bizim futbolçu deyil. Sərbəst oyunçudur və sadəcə, formasını itirməmək ümün məşqlərimizdə iştirak edir.
- Ümumiyyətlə, bu variant necə yarandı?
- Mən Mahiri çoxdan tanıyıram. Milli komandamızda, "İnter"də də birgə çalışmışıq. Mahir mənə müraciət etdi ki, uzun fasilədən sonra futbola qayıtmaq fikrindəyəm və bu məqsədlə "Neftçi"nin məşqlərində iştirak etmək istəyirəm.
- Hər halda, fərdi məşqlə komanda məşqi eyni deyil, fərq böyükdür...
- Şükürov da bundan yararlanmaq istəyir. Mən də ona bu imkanı yaratdım.
- Bir məşqçi olaraq Mahirin hazırkı formasını necə qiymətləndirərdiniz? Artıq çəkidən çoxmu əziyyət çəkir?
- Elə də yox. Ancaq təbii ki, artıq çəki problemi var və uzun müddət oynamadığı üçün hazırda formada deyil. Bunu qaytarmaq üçünsə ona vaxt lazımdır.
- Şükürov formaya düşəndən sonra "Neftçi"də qalıb münasibətləri müqavilə ilə rəsmiləşdirmək variantı varmı?
- Bu haqda söhbətimiz olmayıb. Şükürov bizimlə sadəcə, özü üçün məşq edir. Müqavilə ilə kluba bağlı deyil, nə vaxt istəsə gələ, nə vaxt da istəsə gedə bilər. Mahir başqa kluba va yaxud xarici getmək fikrində olsa belə, onu yenə məşq etdirəcəkdim. Yəni bu, sırf gələcəkdə "Neftçi"də oynaması ilə bağlı deyil. Futbolçunun karyerasını hansı klubda davam etdirmək fikrində olmasını özündən sorumaq lazımdır.
- Bəs siz onu formaya salıb öz futbolçunuz etmək istərdiniz?
- Bunu indidən deyə bilmərəm. Hər şeyi zaman, futbolçunun hazırlığının hansı vəziyyətdə olacağı göstərəcək. Mahir təcrübəli futbolçudur. Hər bir klub yaxşı formada olan belə bir təcrübəli oyunçunu heyətində görmək istəyər. Şükürov Azərbaycanın tanınmış futbolçularındadır. Futbolumuzda ad çıxardıb, millimizdə 60-dan çox oyun keçirib. Bunlar az göstərici deyil. Hər halda, biz də öz sözünü demiş belə oyunçuların futbola qayıtması üçün öz köməkliyimizi göstərməliyik.
Mehman Süleymanov
