"Sumqayıt" və "Neftçi" komandaları arasındakı Topaz Premyer Liqasının XVI tur matçının 60-cı dəqiqəsində baş verənlər "Kapital Bank Arena"da azarkeşlərin oyun izləmək sarıdan üzləşdikləri problemi bir daha gündəmə gətirib.
Sportnet.az-ın məlumatına görə, stadionda olan cəmi bir tribuna tam dolduqda əlavə tamaşaçılar görüşü hasarlar arxasından ayaq üstə izləməli olurlar. Bu zaman xüsusən, futbolçuların qohumları və dostları meydanın mərkəzinə yaxın hissədə cəmləşirlər. Onlar ehtiyat oyunçular skamyasının arxasındakı hasara söykənərək, söz atır, meydanda baş verənlərə kobud formada müdaxilələr edirlər. Nəticədə ehtiyat oyunçular skamyasındakı məşqçi-futbolçu heyəti ilə fanatlar arasında mübahisələr, xoşagəlməz hallar yaşanır. Belə hallara təhlükəsizlik xidməti əməkdaşları da vaxtında reaksiya verə bilmirlər.
Sonuncu belə problem ötən gün "Sumqayıt" - "Neftçi" matçında baş verib. Top uğrunda mübarizə zamanı qonaq komandanın müdafiəçisi İlkin Qırtımovla meydan sahiblərinin hücumçusu Ehtiram Şahverdiyev toqquşub. Hasarın arxasında duran Ehtiram Şahverdiyevin atası Etibar Şahverdiyev isə epizoda sərt reaksiya verərək, Qırtımovun ünvanına söyüşlər yağdırmağa başlayıb. Baxmayaraq ki, baş hakim İnqilab Məmmədov bunadək Qırtımovu sarı vərəqə ilə cəzalandırmışdı. Bu zaman əsəblərinə hakim ola bilməyən "Neftçi"nin digər futbolçusu Rəşad Sadiqov ata Şahverdiyevə nalayiq ifadə ilə cavab verib. Referi Sadiqovu qırmızı vərəqə ilə meydandan qovub. "Sumqayıt"ın baş məşqçisi Samir Abasov isə "Neftçi"nin ehtiyat oyunçular skamyası tərəfə gələrək, Ehtiram Şahverdiyevin atasına iradını çatdırıb. Polislər həmin şəxsi hasarın arxasından çətinliklə uzaqlaşdırıblar.
Problemin həlli yolu kimi əlavə tribunanın tikilməsinin vacibliyi barədə mətbuatda dəfələrlə məsələ qaldırılıb. Lakin klub rəhbərliyi bunun üçün sponsorlar tərəfindən vəsaitin ayrılmalı olduğunu açıqlayıb. AFFA rəhbərliyi isə yaxın vaxtlarda Kapital Bank Arenada təmir işlərinə başlanılacağını bəyan edib.
