"Qəbələ”nin baş məşqçisi Roman Qriqorçuk Türkiyənin Antalya bölgəsindəki hazırlıq prosesi və keçirdikləri yoxlama oyunları barədə danışıb. Sportnet.az-ın məlumatına görə, ukraynalı mütəxəssis klubun rəsmi saytına açıqlamasında Türkmənistanın "Altın Asır" komandası ilə 3:3 hesablı heç-heçəni xeyli qol imkanlarını qaçırmaları ilə əlaqələndirib.
O deyib: "Sonuncu yoxlama oyunumuzun ssenarisi bizim üçün bir az uğursuz oldu. Oyunun ilk hissəsində xeyli qol imkanlarını qaçırdığımızdan, matç başqa məcrada davam etdi. Nəticədə çətin vəziyyətə, hesabda iki top geriyə düşdük. Komandamın məhz belə durumda özünü necə göstərməsi mənə maraqlı idi. Hesabdakı geriliyi aradan qaldıra bilməyimiz xarakterin olduğunu göstərir. Bu isə çox vacib amildir. Fasilədən sonra rəqibi tam üstələdik. Futbolçuların ikinci hissədə əzmkarlıq göstərmələri nəticəsində məğlubiyyətdən qaça bildik. Məhz ikinci hissəyə əsasən məndə yaxşı təəssürat qaldı”.
Ukraynalı mütəxəssis mövsümün ikinci yarısında "qırmızı-qaralar”ın qarşısında duran məqsədi də açıqlayıb: "Biz indidən heç nəyi proqnozlaşdıra bilmərik. Qarşımızdakı çətin vəzifə avrokuboklara vəsiqə qazanmaqdır. Bunun üçünsə turnir cədvəlində irəliləməliyik. Avropa Liqasına düşmək üçün 10 xallıq fərqi aradan qaldırmalıyıq. Bu isə heç də asan iş deyil. Ancaq qarşımıza qoyduğumuz bu çətin vəzifəni həll etməliyik”.
