Bu gecə DÇ-2014-ün ikinci finalçısı müəyyənləşəcək. Sportnet.az-ın məlumatına görə, yarımfinalda Hollandiya və Argentina yığma komandaları üz-üzə gələcəklər.
Oyundan öncə
Hollandiya yığması DÇ-2014-ün favoriti hesab edilə bilər. Elə mundialın ilk oyununda dünya çempionu - İspaniya yığması üzərində 5:1 hesablı qələbə nəyə desən dəyər! Doğrudur, Avstraliya və Meksika ilə görüşlərdə hər şey yağ kimi getməyib. Ancaq Van Persi və dostları yarımfinaladək əbəs yerə irəliləmədiklərini sübut etməyi bacarıblar. 1/4 finalda oyuna Van Qal müdaxilə etdi. Özü də necə! Əlavə vaxtın son dəqiqələrində qapıçını əvəzləyən mütəxəssis de-fakto komandasını yarımfinala daşıdı. Doğrudur, Sillissen baş məşqçinin bu qərarından olduqca narazı idi. Ancaq bir müddət sonra o, Krulu çıxardığı 2 penalti münasibəti ilə təbrik etməli oldu.
Desək ki, Argentina Maradonanın dövrlərinin Argentinasını xatırladır, ədalətsizliyə yol vermiş olarıq. Yalnız cənubi amerikalılarının lideri - Lionel Messi fərdi ustalığı hesabına komanda yoldaşlarını arxasınca apara bilir. Maraqlıdır ki, Argentina bu mundialda keçirdiyi bütün görüşləri 1 top fərqi ilə udub. Qrup mərhələsində Bosniya və Herseqovinanı 2:1, İranı 1:0, Nigeriyanı 3:2 məğlub edən Alexandro Sabelyanın rəhbərlik etdiyi kollektiv 1/8 finalda İsveçrəni əlavə vaxtda Di Mariyanın dəqiq zərbəsi sayəsində mundialdan kənarlaşdırmağı bacarıb. DÇ-2014-ün 1/4 final mərhələsində isə Argentinanın dadına İquain çatıb. "Albiseleste" "pley-off"da yenə də tək qol hesabına irəliləyib.
Argentina ilə görüşdə dizində zədəsi olan Vlaarın iştirakı sual altındadır. Hollandiya yığmasının kapitanı Robin Van Persini mədəsi narahat edir və o da yarımfinalda oynamaya bilər. Belçika ilə görüşdə zədələnən Di Mariyanın isə "narıncılar"la oynamayacağı dəqiqdir. Əvəzində sıraya qasıq nahiyəsində əzələsini dartan Serxio Aquero dönür.
Bu iki komandanın qarşılaşmalarında Argentina cəmi bir dəfə sevinib. Əvəzində Hollandiya 4 oyunda rəqibini məyus yola salıb. Sonuncu dəfə tərəflər 2006-cı ildəki dünya çempionatının qrup mərhələsində qarşılaşıblar. Həmin görüşdə qalib müəyyən edilməyib.
Hollandiya: 1. Sillessen, 2. Vlaar, 3. de Vriy, 4. Martins İndi, 5. Blind, 6. De Yong, 9. van Persi (kap.), 10. Sneyjder, 11. Robben, 15. Kuyt, 20. Viynaldum
Argentina: 1. Romero, 2. Qaray, 4. Zabaleta, 6. Biglia, 8. Peres, 9. İquain, 10. Messi (kap.), 14. Maskerano, 15. Demiçelis, 16. Roxo, 22. Lavessi
Baş hakim: Cüneyt Çakır (Türkiyə)
San-Paulu şəhəri. "Arena Korintians" stadionu.
Matç əfsanəvi futbolçu Alfredo Di Stefanonun xatirəsinə 1 dəqiqəlik sükutla başlayır.
İlk dəqiqələrdən Hollandiyanın ərazi üstünlüyü var.
12-ci dəq. Sneyderin zərbəsi qapıdan azacıq aralı keçdi.
13-cü dəq. Peresə qarşı kobudluq. Türkiyəli referi cərimə zərbəsi təyin edir. Messinin güclü zərbəsini Silessen tutur.
17-ci dəq. Peresin ötürməsinə İquain çatsaydı, qapıçı ilə təkbətək qalacaqdı.
Bu dəqiqələrdə təşəbbüs Argentinanın tərəfindədir.
25-ci dəq. Argentina millisindən növbəti təhlükə. Bu dəfə Qaray künc zərbəsindən sonra başla topu qapıdan keçirə bilmir.
26-cı dəq. Maskerano Viynaldumla top uğrunda mübarizədə başından zərbə alaraq, yerə yıxılır.
45-ci dəq. Matçda ilk sarı vərəqə. Messiyə qarşı kobudluğa görə İndi cəzalandırılır.
İlk yarıya 2 dəqiqə əlavə olunur.
45+2-ci dəq. Roxonun ötürməsinə İquain çata bilmir.
Fasilə
İkinci hissə əvəzləmə ilə başlayır. Martins İndinin əvəzinə Yanmat oyuna daxil olur.
49-cu dəq. Demiçelis sərt oyuna görə sarı vərəqə alır.
60-cı dəq. Oyun yenə ilk yarıdakı kimi təhlükəli vəziyyətlərsiz davam edir.
62-ci dəq. Hollandiya millisində növbəti əvəzləmə. De Yonqun əvəzinə Yordi Klasi meydana daxil olur.
Oyunda Braziliya - Almaniya matçındakı kimi qol yağışı olmasa da, əsl yağış yağır.
81-ci dəq. Argentina millisində 2 əvəzləmə. İquaini Serxio Aquero, Entso Peresi isə Rodriqo Palasio əvəzləyir.
90-cı dəq. İkinci hissəyə 3 dəqiqə əlavə olunur.
90+1-ci dəq. Robben təkbətəkdən yararlana bilmir.
Əsas vaxt başa çatdı. Hər biri 15 dəqiqədən ibarət iki əlavə vaxt təyin olunur.
Əlavə vaxt başladı
96-cı dəq. Robben əlverişli mövqeyə çıxsa da, ona qapıya zərbə endirmək imkanı verilmir.
101-ci dəq. Lavessinin əvəzinə Maksimiliano Rodriges meydana daxil olur.
105-ci dəq. Maskeranoya qarşı kobudluğa görə Çakır Huntelara sarı vərəqə göstərir.
İlk əlavə vaxta 1 dəqiqə əlavə olunur.
105+1-ci dəq. Aquero qapı qarşısına ötürməyə çata bilmir.
İlk ekstrataym başa çatdı.
İkinci əlavə vaxt başladı.
