Bu gün dünya çempionatının bürünc mükafatçısı məlum olacaq. Sportnet.az-ın məlumatına görə, 3-cü yer uğrunda görüşdə Braziliya və Hollandiya yığmaları qarşılaşacaq.
Oyundan öncə
Braziliya yığması 3-cü yer uğrunda görüşdə təsəlli tapa biləcəkmi? Matçsonrası
penalti seriyasını nəzərə almasaq, Hollandiya turniri heç kimə məğlub olmadan bitirə
biləcəkmi? Yerli azarkeşlər "pentakampeonlar”ı yenə dəlicəsinə
dəstəkləyəcəklərmi? Robben və Van Persi fərqlənə biləcəklərmi? Bütün bu suallar
yarımfinalda büdrəyən yığmaların "təsəlliverici finalı”na yerinə düşür.
Luis Felipe Skolarinin rəhbərlik etdiyi Braziliya millisi tarixinin
ən böyük hesablı məğlubiyyətini DÇ-2014-ün yarımfinalında aldı: Almaniya ilə
oyun 1:7 nəticələndi.
Hollandiya isə Argentina ilə görüşdə qapısının toxunulmazlığını penalti
seriyasına qədər qoruya bildi. Ancaq "lotereya”da "narıncılar” məğlub oldular.
Tarix ərzində Braziliya və Hollandiya yığmaları 11 dəfə üz-üzə
gəliblər. Hələ ki, tərəflərin bütün göstəriciləri eynidir: hərəyə 3 qələbə və 5
heç-heçə. Hətta topların nisbətində də tərəzidə tarazlıq pozulmayıb – 15:15.
CAR-da keçirilən ötən mundialın ¼ finalında Hollandiya 2:1 hesabı ilə qalib
gəlib. Robinyonun ilk yarıdakı qoluna fasilədən sonra Sneyder "dubl”la cavab
verib. Braziliyanın hazırkı iştirak ərizəsində həmin heyətdən cəmi 3 futbolçu
qalıb. Hollandiya yığması bu göstəricidə rəqibini 2 dəfə üstələyir.
Dünya çempionatlarının final mərhələsində tərəflər 4 dəfə üz-üzə
gəliblər. 2010-cu il haqda qeydlərimizlə tanışsınız. 1974-cü ildə Rinus
Mihelsin rəhbərlik etdiyi Hollandiya yığması 2:0 hesablı qələbə qazanıb. 20 il
sonra Braziliya 3:2 hesabı ilə rəqibindən güclü olub. 1998-ci ilin yarımfinalında da
cənubi amerikalılar penalti seriyasında qalib gəliblər.
Braziliya yığmasının əsas heyət oyunçularından ikisi yarımfinalda
iştirak edə bilmədi. Ancaq zədəli Neymardan fərqli olaraq, 1 oyunluq diskvalifikasiya
müddəti başa çatan kapitan Tyaqo Silva bu dəfə əsas heyətdə yer ala biləcək.
Adətən 3-cü yer uğrunda görüşlərdə baş məşqçilər mundialda az və ya oynamaq şansı qazanmayan futbolçulara şans verirlər. Lakin bu dəfə bir qədər fərqli mənzərə yaranıb: alçalmış Braziliya və məğlubiyyətin nə olduğunu bilməyən Hollandiyanın baş məşqçiləri futbolsevərlərə əsl bayram bəxş etmək istəyə bilərlər.
Qol: Robin van Persi, 3 - penalti ilə. Blind, 17. Viynaldum, 90+1
Braziliya: 12. Julio Sezar, 3. Tiaqo Silva (kap.), 4. David Luis, 8. Paulinyo, 11. Oskar, 14. Maksvell, 16. Ramires, 17. Luis Qustavo, 19. Villian, 21. Jo, 23. Maykon
Hollandiya: 1. Sillessen, 2. Vlar, 3. De Vriy, 4. Martins İndi, 5. Blind, 8. De Quzman, 9. Van Persi (kap.), 11. Robben, 15. Kuyt, 16. Klasi, 20. Viynaldum
San-Paulo şəhəri. "Arena de San-Paulo" stadionu.
Matç başladı.
2-ci dəq. Robbenə qarşı kobudluğa görə Braziliya yığmasının qapısına penalti təyin olunur və kobudluğa yol verən Tiaqo Silvaya sarı vərəqə göstərilir.
3-cü dəq. QOOOL! Robin van Persi penaltini dəqiq yerinə yetirərək, DÇ-2014-də 4-cü qolunu vurur.
6-cı dəq. Braziliya yığmasının hücumu. Cinahdan qapı qarşısına ötürməyə Ramires ayaq qoya bilmir.
9-cu dəq. Robbenə də sarı vərəqə göstərilir.
17-ci dəq. QOOOL! Blind cinah ötürməsini ustalıqla saxlayaraq, qapıya yönəldir.
21-ci dəq. Oskarın uzaqdan zərbəsini qapıçı tutur.
36-cı dəq. De Quzman kobud oyuna görə sarı vərəqə alır.
38-ci dəq. David Luis Ramiresin ötürməsinə toxuna bilmir.
41-ci dəq. Van Persinin zərbəsini Julio Sezar tutur.
90-cı dəq. Klasinin əvəzinə Veltman oyuna girir.
Baş hakim əsas vaxta 5 dəqiqə əlavə edir.
Oyun başa çatdı.
Matçın oyunçusu - Aryen Robben (Hollandiya)
