Hazırda Türkiyəni təmsil edən əslən azərbaycanlı atlet Ramil Quliyev Böyük Britaniyanın paytaxtı Londonda keçirilən dünya çempionatında finala yüksəlib.
Sportnet.az-ın məlumatına görə, 27 yaşlı sprinter bu nailiyyətə 200 metr məsafəyə yarımfinal qaçışında imza atıb. O, finişə 20,17 saniyəyə çataraq, bütün rəqiblərini üstələyib. Quliyevin yarımqrupundan ilk "3-lüy"ə düşən ABŞ təmsilçisi Amir Uebb və CAR-dan olan Vayd van Nikerk də adını finala yazdırıb. Digər iki yarımqrupdan isə bu hüquqa İsiah Yanq (ABŞ), İsaak Makvala (Botsvana), Nethanel Mitçell-Bleyk (Böyük Britaniya), Yarim Riçards (Trinidad və Tobaqo), Abdul Hakim Sani Braun (Yaponiya) yiyələnib.
Qeyd edək ki, final qaçışı Bakı vaxtı ilə avqustun 11-nə keçən gecə saat 00:52-də olacaq. İndiyədək Ramil Quliyev dünya çempionatlarında iki dəfə finala yüksəlib. O, 2009-cu ildə Azərbaycanı təmsil etdiyi vaxt Almaniyanın paytaxtı Berlində, 2015-ci ildə isə Çinin paytaxtı Pekində həlledici mərhələyə vəsiqə qazansa da, medalçılar sırasına düşə bilməyib.
