Yanvarın 5-dən Türkiyənin Antalya bölgəsində təlim-məşq toplanışında olacaq "Qəbələ”nin hazırlıq çərçivəsində qarşılaşacağı komandalardan daha biri müəyyənləşib. Sportnet.az-ın məlumatına görə, "qırmızı-qaralar” qardaş ölkədə keçirəcəyi 2-ci yoxlama oyununda "Eskişehirspor”la qarşılaşacaq.
Türkiyə Superliqası təmsilçisi ilə görüş yanvarın 14-də baş tutacaq. Bunadək "Qəbələ”nin toplanışının ilk hissəsindəki digər oyunların tarixi və rəqiblər də müəyyənləşmişdi. İlk yoxlama oyununu yanvarın 10-da keçirəcək "qırmızı-qaralar” Hollandiya PSV-sinin ikinci komandası ilə üz-üzə gələcək. Ayın 17-də 2 matça çıxacaq komanda əvvəlcə Qazaxıstan klublarından biri ilə görüşəcək ki, bu rəqibin adı dəqiqləşməyib. Həmin gün təmsilçimizin digər rəqibi "Vorskla" (Poltava, Ukrayna) olacaq. "Qəbələ” bundan əlavə yanvarın 22, 25 və 29-da sınaq matçlarına çıxacaq. Bu qarşılaşmalardakı rəqiblərin adına yaxın günlərdə aydınlıq gələcək.
Qeyd edək ki, Antalya toplanışına yanvarın 29-da yekun vurulacaq.
