Aprelin 11-də ABŞ-ın Los Anceles şəhərində sərbəst güləş üzrə Dünya Kuboku yarışlarında iştirak edəcək Azərbaycan yığma komandası adı çəkilən ölkədədir. Sportnet.az-ın məlumatına görə, Los Anceles hava limanında yığmanın üzvlərini orada yaşayan həmyerlilərimiz və Konsulluğun rəsmiləri qarşılayıb.
Azərbaycanlı pəhləvanlar onlar üçün ayrılmış oteldə yerləşdikdən sonra gündə 2 dəfədən ibarət olmaqla məşqlərini davam etdirir. Yığma komandanın böyük məşqçisi Firdovsi Umudov güləşçilərin əhval-ruhiyyəsinin yüksək olduğunu bildirib:
"Yarış gününə qədər məşqlərimizi burada davam etdiririk. İdmançıların iqlim şəraitinə və vaxt rejiminə uyğunlaşa bilməsi üçün bir neçə gün əvvəl gəldik. Federasiyamız tərəfindən burada hazırlığımız üçün lazımi bütün işlər görülüb. Komandamız hazır vəziyyətdədir. Çalışacağıq ki, layiqli nəticə qazanaq və xalqımızı sevindirək".
Qeyd edək ki, Azərbaycan yığması Dünya Kuboku yarışlarında "B” qrupunda İran, Belarus və Türkiyə yığmaları ilə mübarizə aparacaq.
