Niderland Eredivizisində XIV turun "Ayaks" - "Qroningen" matçı yarımçıq dayandırılıb.
Sportnet.az-ın məlumatına görə, buna Amsterdam komandasının azarkeşlərinin davranışları səbəb olub.
Onlar "Yohan Kroyf Arena"nın tribunalarında pirotexniki vasitələri yandırıblar.
Oyun cəmi 5 dəqiqə çəkib. 40 dəqiqəlik ilk fasilədən sonra referi Bas Nayxeys komandaları meydançaya qaytarıb. Lakin matç bərpa olunduqdan dərhal sonra fanatlar yenidən pirotexnika yandırmağa və onu meydançaya atmağa başlayıblar.
Nəticədə baş hakim təhlükəsizlik məqsədilə komandaları meydançadan çıxarmağa qərar verib. Bu dəfə isə oyun birdəfəlik dayandırılıb və təxirə salınıb.
Fanatların pirotexnika şousunu bu yaxınlarda ölmüş azarkeşin xatirəsinə həsr etdikləri bildirilir.
Qeyd edək ki, hazırda "Ayaks" Niderland çempionatında 13 oyundan 20 xalla 6-cı yerdə gedir. Çempionlar Liqasında isə Amsterdam komandası indiyədək keçirdiyi 5 oyunun hamısından məğlub ayrılıb. Növbəti görüş dekabrın 10-da Bakıda "Qarabağ"a qarşı olacaq.
