Hollandiyanın futzal üzrə milli komandasının baş məşqçisi Marsel Losveld Azərbaycan yığması ilə aprelin 12-də Bakıda keçirəcəkləri dünya çempionatının "pley-off" mərhələsinin cavab görüşü barədə danışıb. Sportnet.az-ın məlumatına görə, 53 yaşlı mütəxəssis ilk matçdakı 1:5 hesablı ev məğlubiyyətinin əvəzini çıxmalarının real görünmədiyini etiraf edib.
O, heyətdə dəyişikliyə lüzum görmədiyini bildirib. Losveldin fikrincə, hazırkı heyət daha yaxşı çıxış etməyə qadirdir: "Biz bunu seçmə mərhələdə və Portuqaliya ilə yoldaşlıq görüşündə göstərdik. Azərbaycan millisinin sərt rəqib olduğunu öncədən bilirdik. Amma Almeredə ikinci hissədə yaxşı müqavimət göstərə bilmədik. Əsl səviyyəmizi ortaya qoymağı bacarmırıq. Belə həlledici qarşılaşmada uduzmaq üzücüdür. Bakıdakı cavab görüşü tamamilə bərpa və formaya düşməyimizə həsr olunacaq.
Qeyd edək ki, aprelin 12-də Bakı İdman Sarayında keçiriləcək Azərbaycan - Hollandiya matçı saat 19:00-da başlanacaq.
