UEFA-nın rəsmi saytı Azərbaycan və Hollandiyanın futzal üzrə milli komandaları arasında aprelin 12-də keçiriləcək dünya çempionatının "pley-off" mərhələsinin cavab oyununun başlama saatında səhvə yol verib. Sportnet.az-ın məlumatına görə, qurumun rəsmi saytında matçın Avropa vaxtı ilə saat 17:00-da başlanacağı yazılıb.
Bu isə Bakı vaxtı ilə saat 19:00 deməkdir. Odur ki, sual yaranır: Oyunun start fiti nə vaxt çalınacaq?
AFFA-nın İnformasiya və İctimaiyyətlə Əlaqələr Departamentinin rəisi Mikayıl Nərimanoğlunun sözlərinə görə, oyunun başlama saatını Azərbaycan tərəfi təyin edib. Milli assosiasiya görüşün saat 20:00-da başlanmasına qərar verib və UEFA-nı məlumatlandırıb. Həmin vaxt Avropa ilə fərq 3 saat olub. Ona görə də UEFA-nın rəsmi saytında oyunun saat 17:00-da başlanacağı göstərilib. Lakin Azərbaycanda saatlar irəli çəkilmədiyindən, fərq 2 saata enib. Bununla belə, UEFA görüşün vaxtını saat 18:00-a çəkməyib.
AFFA rəsmisi qitə futbol qurumu ilə əlaqə saxlayacaqlarını və yanlışlığın aradan qaldırılacağını əlavə edib.
Qeyd edək ki, Azərbaycan - Hollandiya qarşılaşması Bakı İdman Sarayında təşkil olunacaq.
