"Xəzər Lənkəran” "Neftçi” ilə "Böyük oyun”larda uğursuz tendensiya ilə üzləşib. Sportnet.az-ın məlumatına görə, Lənkəran təmsilçsi ardıcıl 3-cü çempionatdır prinsipial rəqibi ilə keçirdiyi 4 oyunun heç birində qalib gələ bilmir. Bununla da qələbə həsrəti 12 matça çatıb.
Cənublular "Neftçi”yə Premyer Liqada sonuncu dəfə 2012/13 mövsümündə qazanıb. Bu, 2012-ci ilin dekabrın 14-də Lənkəranda 2:1 hesablı qələbə olub.
"Neftçi” "Böyük oyun”da ardıcıl 11 matçdır meydanı qolsuz tərk etmir. Ancaq bu dəfə əvvəlki 4 səfər görüşündə olduğu kimi 2 qol vurmaq mümkün olmadı.
"Ağ-qaralar” "Xəzər Lənkəran”la oyunlarda balansında üstünülüyü xeyli artırıb. Belə ki, 37 oyundan 15-də bakılılar, 7-də lənkəranlılar qalib gəlib, 15 matçda isə heç-heçə qeydə alınıb.
Xatırladaq ki, "Xəzər Lənkəran” "Neftçi”yə cari mövsümdə qalib gəlib. Sadəcə, Lənkərandakı həmin matç (3:2) ölkə kubokunda olub.
