"Barselona"nın baş məşqçisi Luis Enrike son vaxtlar komandanın uğursuz çıxışına görə narahat deyil. Sportnet.az xəbər verir ki, 45 yaşlı ispaniyalı mütəxəssis liderliyi əldən buraxmayacaqlarını düşünür.
Onun sözlərinə görə, Primeronun sonuna 5 tur qalmlş "Atletiko"nu əlavə göstəricilərə görə qabaqlayan, əzəli rəqibi "Real Madrid"dən isə cəmi 1 xal qabaqlayan "Barselona" sonda da 1-ci olacaq: "Mən əminəm ki, İspaniya çempionu biz olacağıq. Əks təqdirdə, bu postda olmazdım. Çətinliklər xoşuma gəlir. Qarşıdakı turda "Deportivo"ya qalib gəlməklə vəziyəti düzəltmək istəyirəm. Özü də bunu gözəl şəkildə etmək istəyirəm. Mən hələ də arxamızca gedən azarkeşləri sevindirmək istəyirəm. Hərçənd, onlar da başa düşmürlər ki, komanda ilə bağlı nə baş verir".
Qeyd edək ki, Luis Enrike ötən mövsüm "Barselona"nı çempion edib.
