İsrail milli komandasına yeni baş məşqçi təyinatı olub. Sportnet.az-ın məlumatına görə, bu ölkənin futbol yığmasına Elişa Levinin rəhbərlik edəcəyi rəsmən açıqlanıb. 58 yaşlı israilli mütəxəssis bu postda həmyerlisi Eli Qutmanı əvəzləyib.
Levinin qarşısında duran vəzifə millinin 2018-ci il dünya çempionatının final mərhələsinə çıxarmaqdır. İsrail yığması G qrupunda İtaliya, İspaniya, Albaniya, Makedoniya və Lixtenşteyn milliləri ilə mübarizə aparacaq.
Millinin yeni baş məşqçisi bir sıra yerli klubda çalışıb ki, son iş yeri "Hapoel Beer-Şeva" olub. O, Xayfanın "Makkabi" klubu ilə 2 dəfə ölkə çempionluğunu qazanıb.
Xatırladaq ki, Qutman İsrail yığmasının çalışdırıcısı kimi 2014-cü il dünya çempionatının seçmə mərhələsində Azərbaycan millisinə rəqib olub və iki oyunun heç birində qalib gələ bilməyib. Bu matçlarda 1:1 hesablı bərabərliyə nail olan mütəxəssis millisini 2016-cı il Avropa çempinatının final mərhələsinə çıxara bilmədiyinə görə istefaya göndərilib.
