Bu gün futbol üzrə Azərbaycan Premyer Liqasında XXXI turun daha iki oyunu keçirilib. Sportnet.az-ın məlumatına görə, oyunlar Lənkəranda və Bakıda baş tutub.
Cari mövsümdə uğursuz çıxış edən "Xəzər Lənkəran" qeyri-stabil oyun nümayiş etdirən "Qəbələ"ni qəbul edib. Avrokuboklara iddialı olan "Qəbələ" Lənkəran səfərindən 3 xalla ayrılıb. Qonaqların yeganə qolunu matçın 9-cu dəqiqəsində Aleksey Qay vurub. Nəticədə "Qəbələ" 49 xalla turnir cədvəlinin 3-cü pilləsinə yüksəlib və avrokubok iddiasını saxlayıb. "Ağ-yaşıllar" isə 14 xalla 9-cudür.
"Neftçi" "Bakcell Arena"da "Zirə"ni qəbul edib. Oyunda qalib müəyyənləşməyib - 0:0. Bununla da "Zirə" 60 xalla ikinci pillədə qalıb və lider "Qarabağ"dan 12 xal geri düşüb. "Neftçi" isə 39 xalla 7-cidir.
Turun açılış oyununda "Qarabağ" evdə "İnter"i 2:0 hesabı ilə məğlub edib.
Qeyd edək ki, tura aprelin 24-də keçiriləcək iki oyunla yekun vurulacaq.
23 aprel (şənbə)
16:30. "Xəzər Lənkəran" – "Qəbələ" - 0:1
Qol: Aleksey Qay, 8
Hakimlər: Rəhim Həsənov, Namiq Hüseynov, Vaqif Musayev, Fərid Məmmədov
AFFA nümayəndəsi: Eldar Qasımov
Hakim-inspektor: Şahin Cəfərov
Lənkəran. "Xəzər Lənkəran" mərkəzi stadionu
19:00. "Neftçi" – "Zirə" - 0:0
Hakimlər: Fariz Yusifov, Munis Abdullayev, İsgəndər Əliyev, Ömər Paşayev
AFFA nümayəndəsi: Rauf Əmirov
Hakim-inspektor: Məlik Həsənov
Bakı. "Bakcell Arena"
________________________________________________________________________________________________________________
Bu gün futbol üzrə Azərbaycan Premyer Liqasında XXXI turun daha 2 oyunu keçiriləcək. Sportnet.az-ın məlumatına görə, görüşlərdən biri Bakıda, digəri isə Lənkəranda baş tutacaq.
Artıq heç bir iddiası qalmayan "Xəzər Lənkəran" avrokuboklar üçün mübarizə aparan "Qəbələ"ni qəbul edəcək. Qonaqlar qələbə qazanacağı təqdirdə, turnir cədvəlində 3-cü pilləyə yüksələcəklər. "Ağ-yaşıllar" isə 3 xalla yalnız autsayder "Rəvan"dan bir az da uzaqlaşmış olacaq. Komandalar bugünədək 29 oyunda üz-üzə gəlib. Bu qarşılıaşmaların 13-də "Xəzər Lənkəran", 9-da isə "Qəbələ" 3 xalı aktivinə yazıb. Qalan 7 oyunda bərabərlik qeydə alınıb. Üstəlik, cənublular son 5 matçda "qırmızı-qaralar"a qalib gələ bilməyibsə, "Qəbələ" son 4 qarşılaşmada qol buraxmayıb.
Cari mövsümdə stabil oyun nümayiş etdirməyən "Neftçi" isə turnir cədvəlinin ikinci pilləsində qərarlaşmış "Zirə"ni qəbul edəcək. Vəli Qasımovun rəhbərlik etdiyi komanda doğma meydandan qələbə ilə ayrılsa, turnir cədvəlindəki mövqeyində heç bir dəyişiklik olmayacaq. "Zirə" isə səfər qalibiyyəti sayəsində demək olar ki, cari mövsümün gümüş medalını böyük ölçüdə təmin etmiş olacaq. Komandalar arasında cəmi 3 görüş keçirilib və bunların heç birində "Neftçi" qələbə qazanmayıb. 2 oyunda "Zirə" sevinibsə, biri heç-heçə başa çatıb.
Hər iki oyun "CBC Sport"la canlı yayımlanacaq.
Qeyd edək ki, dünən turun açılış oyununda "Qarabağ" Bakının "İnter" klubunu qəbul edib. Oyun meydan sahiblərin 2:0 hesablı qələbəsi ilə nəticələnib.
