2018-ci ildə UEFA Superkuboku oyunu Estoniyada paytaxtı Tallində keçiriləcək. Sportnet.az-ın məlumatına görə, UEFA həmin ilin avqustun 14-də nəzərdə tutulan matçın "Lillekyula Arena"da keçiriləcəyini rəsmən açıqlayıb.
Bununla bağlı qərar qitə futbol qurumunun İcraiyyə Komitəsinin bu gün Afinada keçirilən iclasında qəbul olunub. 2018-ci ildə Estoniya Respublikasının yaranmasınn 100 illiyidir və UEFA bunu estonlara yubiley hədiyyəsi kimi ərməğan edib. Bu, həmin ölkədə ilk avrokubok finalı olacaq. Bunadək Estoniya yalnız 2012-ci ildə 19 yaşadək futbolçulardan ibarət yığma komadalar arasında Avropa çempionatının final mərhələsinin oyunlarını qəbul edib.
Superkubok matçının keçiriləcəyi stadionda yerli "Flora" klubu və "Qəbələ"nin hücumçusu Sergey Zenyovun heyətində dəfələrlə fərqləndiyi Estoniya milli komandasını oyunlarını keçirir.
Qeyd edək ki, 2017-ci ildə UEFA Superkuboku matçı Makedoniyanın paytaxtı Skopye - "Filipp II Makedoniyalı" adını daşyan Milli Arenada keçiriləcək. Bu, "Neftçi"nin yayda Avropa Liqasında "Şkendiya"ya 0:1 hesabı ilə uduzaraq mübarizədən kənarda qaldığı stadiondur.
