"Sumqayıt"la oyunumuz "Zirə" matçından daha çətin olacaq. Biz bunu bilirik və mübarizəyə hazırıq". Sportnet.az-ın məlumatına görə, bunu "Kəpəz"in futbolçusu Julian Ebah klub saytına açıqlamasında deyib.
Azərbaycan Premyer Liqasının V turunda "Sumqayıt"la keçiriləcək səfər görüşündən danışan hücumçu bu qarşılaşmadan qələbə ilə ayrılmağın vacib olduğunu bildirib: "Ötən turlarda AZAL və "İnter"lə oyunlarda itirdiyimiz xalları sığortalamaq məcburiyyətindəyik. Yaxşı anlayırıq ki, bizə bu mövsüm daha çox xal toplamaq lazımdır. Son iki oyunda fərqlənməyim həm mənim, həm komandamın xeyrinə oldu".
Kamerunlu futbolçu əhval-ruhiyyəsinin düzəldiyini söyləyib: "Əhval-ruhiyyəm artıq düzəlib, məşqçilər korpusu, futbolçular və azarkeşlər mənə böyük ümidlər bəsləyirlər. Ötən mövsümdən daha çox qol vurmaq niyyətindəyəm".
Qeyd edək ki, sentyabrın 18-də "Kapital Bank Arena"da keçiriləcək "Sumqayıt" - "Kəpəz" oyunu saat 18:00-da başlayacaq.
