"Gündəlikdə iki məsələ var idi. Uşaq komandaların yarışlarının keçirilməsi və əvəzedicilərin oyunlarının formatı ilə bağlı. Ona görə də, AFFA-nın Uşaq və Gənclər üzrə Yarışların Təşkili Şöbəsinin müdiri Yusif Vəliyevi də dəvət etmişdik". Sportnet.az-ın məlumatına görə, bunu AFFA-nın Klublar Komitəsinin (KK) sədri Kamran Quliyev bu gün baş tutan iclasdan sonra keçirdiyi brifinqdə deyib.
Azərbaycan premyer Liqasında mübarizə aparan "Sumqayıt" klubunun prezidenti olan Quliyev KK-nın bu gün baş tutan iclasında gündəliyə daxil edilən məsələlərdən danışarkən, uşaq futbolu ilə bağlı mövzuya toxunub: "Bilirsiniz ki, U-15 Liqadan U-19 Liqaya qədər çempionat dövrlə sistemlə keçirilir. Lakin nisbətən aşağı yaş qruplarında qrup sistemidir. Orda da qrup mərhələsi mart ayında bitir və final mərhələinə yüksələ bilməyən komandalar oun praktikasından məhrum olur. Bununla bağlı "Zirə" klubundan təklif gəlmişdi ki, həmin komandalar arasında turnir təşkil olunsun. Bu barədə gələn iclasımızda təkliflərimiz hazırlanacaq və AFFA-nın müvafiq şöbəsinə təqdim olunacaq".
KK-nın sədri əvəzedici komandaların oyunlarının Premyer Liqa klublarının matçlarından bir gün sonra keçirilməsi məsələsinə də toxunub: "Əvəzedici komandaların oyunlarının Premyer Liqa klublarının matçalrından bir gün sonra keçirilməsi təklifi daha öncə də var idi. Nəhayət ki, bütün klublarda vahid fikir yaranıb. Ona görə də, bununla bbağlı yaxın günlərdə Peşəkar Futbol Liqasında müraciət edəcəyik. Biz dünyada olan praktikanı təhlil etdik. Bir çox ölkədə əvəzedicilərin çempionatı fərqli formatda keçirilir. Onlarda Premyer Liqaya bağlılıq yoxdur. Bizdə əsas məsələ komandanın tərkibində 21 yaşadək bir oyunçu mütləq meydançada olmasıdır. Baş məşqçilər ehtiyatda qalacaq oyunçuları müəyyənləşdirəndə ən azı 2 gənci nəzərdə tuturlar. lakin əksər hallarda meydana çıxmırlar. Üstəlik, o futbolçular əvəzedicilərə qatıla bilmirlər. Əgər gənc oyunçu əvəzedicilərdə oynamırsa, bu yaxşı deyil".
