İtaliya A Seriyasında XXXIV tur "Roma" və "Latsio" arasındakı paytaxt derbisinə təsadüf edib. Sportnet.az-ın məlumatına görə, "Olimpiko" stadionunda keçirilmiş Roma derbisində nominal qonaqlar qələbə qazanıb - 3:1.
Hesabı 12-ci dəqiqədə "Latsio"nun oyunçusu Keyta Balde açıb. 45-ci dəqiqədə penalti qolu ilə Daniele De Rossi tarazlıq yaratsa da, fasilədən sonra "Latsio" daha 2 qol vurub. 50-ci dəqiqədə Duşan Basta yenidən komandasını irəli çıxarıb. 85-ci dəqiqədə isə Balde özünün ikinci, komandasının üçüncü qolunu vurub.
Bu nəticədən sonra xallarını 67-yə çatdıran "Latsio" 4-cü pillədə qalıb. "Roma" isə 75 xalla 2-cidir. Bu isə o deməkdir ki, hazırda 84 xala malik "Yuventus" gələn tur Turin derbisində "Torino"nu yensə, vaxtından əvvəl çempionluğunu elan edəcək.
