"Səbail"in kapitanı Eltun Yaqublunun Sportnet.az-a müsahibəsi
- Komandanın kapitanı kimi mövsümün ilk yarısını necə dəyərləndirirsiniz?
- İlk dövrə bizim üçün normal keçdi. Təzə komandayıq. Futbolçular 3-4 aydır birlikdə oynayırdılar. Qış fasiləsinə 6-cı yerdə yolllanmaq normal nəticədir. Pis çıxış etmədik. Bəzi matçlarda yaxşı oynadıq. Birinci, ikinci yerdə qərarlaşan komandalarla görüşlərdə yaxşı təsir bağışlayırdıq.
- Qış fasiləsi komandaya necə təsir edə bilər?
- Baş məşqçimiz yəqin ki, yeni futbolçular axtarır. Heyəti daha da gücləndirmək istəyir. İnanıram ki, ikinci dövrə daha da yaxşı olacaq. Futbolçular bir-birinə uyğunlaşacaq.
- Reallaşan transferlər barədə nə deyə bilərsən?
- Ayrı-ayrılıqda götürsək pis çıxış etmədilər. Normal oyun sərgilədilər.
- Komandanı tərk edənləri nəzərdə tutursunuz?
- Bəli. Gedənlər haqqında danışıram. Həmin futbolçular orta səviyyədə çıxış etdilər. Əllərindən gələn köməkliyi göstərdilər. Baş məşqçi onları komandada görmək istəmədi.
- Popoviçi mövsüm ərzində yaxşı təsir bağışlayırdı. Onun getməyi süpriz olmadı?
- 2 qol vurdu. Bəzi oyunlarda yaxşı oynayırdı. Bu baş məşqçinin qərarıdır. Bəlkə oyun üslubunu bəyənməyib. İnanırıq ki, daha yaxşı futbolçular gələcək. Legionerlər yerli futbolçudan seçilməlidir. Ən azı 2 dəfə çox xeyir verməlidir. Samir müəllim həmişə deyir ki, onlar eyni səviyyədə oynayırlarsa, onda yerlilərə şans verərəm. Popoviçi də yeqin ki, məşqçiləri qane etməyib.
- Hər hansı bir futbolçu komandanı tərk etməyəcək?
- Qış fasiləsinə yollanmamışdan öncə dəyişikliklər olacağını bilirdim. Bəzi yerli və əcnəbi futbolçularla yolların ayrılacağını düşünürdüm. Legionerlər komandanı tərk etdi. Transferləri mən də mediadan oxuyuram. Komandaya Fəhmin gəlib. Tanıdığımız futbolçudur. İnanıram ki, o, bizə kömək edəcək.
