"Kəpəz"in yeni transferi Samir Zərgərovun Sportnet.az-a müsahibəsi...
- "Kəpəz"ə keçidin necə baş verdi?
- Klub rəhbərliyi ilə danışıqlar apardıq. Təkliflər irəli sürdülər. Sağ olsun, Yunis Hüseynov. Hər şey qarşılıqlı razılaşma əsasında baş verdi. Bu klub mənə doğma olduğundan, fikirləşməyə ehtiyac duymadım.
- "Kəpəz"dən təklif olmasaydı, "Keşlə"də qalardın?
- Təklif olmasaydı, "Keşlə"lə qala bilərdim. Vaxtilə Gəncə komandasında oynamışam. "Kəpəz" barədə çox şey bilirəm.
- "Kəpəz"ə transferiniz azad agent kimi reallaşdı, yoxsa "Keşlə" ilə klub arasında razılaşma oldu?
- Azad agent deyildim. Klubla müqaviləm var idi. "Keşlə" rəhbərliyi ilə görüşdüm, danışdım. Klub keçid üçün mənə şərait yaratdı və "Kəpəz"ə transferim baş tutdu.
- Son pillələrdə qərarlaşan klubun birindən digərinə keçmisiniz. Mövsümün ikinci yarısında irəliləyiş gözləyirsiniz?
- Bu klublar hazırda yaxşı vəziyyətdə deyil. İkisi də son pillələrdə qərarlaşıb. Düşünürəm ki, "Kəpəz"ə yaxşı futbolçular cəlb olunacaq. Biz futbolçular icazə vermərik ki, Gəncə klubu bu mövqedə qalsın. Əliməzdən gələni edəcəyik ki, klub daha yüksək pillələrə qalxsın.
- Sabiq klubunda danışılmış oyunlara görə xoşagəlməz hadisələr baş verdi. Belə halları necə qəbul edirsən?
- Mən də həmin komandanın içində olmuşam. Onları da yaxşı tanıyıram. İnanmırdım ki, elə hadisələr baş versin. Həmin futbolçularla (Nizami Hacıyev və Mirhüseyn Seyidovla - red.) neçə il birgə oynamışıq. Bu, heç də yaxşı hall deyil. Belə şeylər futbolda varsa, təmizlik işləri aparmaq lazımdır.
- Nizami Hacıyev komandanın kapitanı idi. Onun sizinlə "Keşlə"nin uğurlu çıxış etməsinin vacibliyi haqda danışıb, kənarda komanda əleyhinə işlərlə məşğul olacağına inanırsınız?
- Bu mövzü haqda çox danışmaq istəmirəm. Hazırda yalnız özümü və yeni klubumu fikirləşirəm. Əlimizdən gələni edəcəyik ki, "Kəpəz" yaxşı yerlər uğrunda mübarizə aparsın. Həmin şəxsləri yaxşı tanıyıram. İnanmıram ki, onlar belə əməl törətsinlər.
- Əvvəlki və indiki Gəncə komandalarını müqayisə etsəniz, nələr dəyişdiyini deyə bilərsiniz?
- O vaxt mənim oynadığım komanda "Kəpəz" yox, "Gəncə" adlanırdı. "Kəpəz" həmişə yaxşı yerlər uğrunda mübarizə aparıb. Əlimizdən gələni edəcəyik ki, klubun əvvəlki əzəməti geri qayıtsın. Biz "Kəpəz"ə məhz "Gəncə" adı ilə çıxış etməzdən əvvəlki gücü qaytarmaq istəyirik.
Təbriz QULİYEV
