"Mən Yohannesburqdan 110 km aralıdakı kənddə doğulmuşam. Amma hər şey Yohannesburqda idi. Hələ gənc ikən arzum peşəkar futbolçu olmaq idi. Buna görə də "Platinium Star" klubunun akademiyasına baxışa yollanırdım".
Sportnet.az-ın məlumatına görə, bunu "Qarabağ"dan Çinin "Hançjou Qrintaun" klubuna keçən Dino Ndlovu "France Presse" agentliyinə açıqlamasında deyib. 28 yaşlı hücumçu bildirib ki, ilk peşəkar müqaviləni bağlayanadək ağır günlər keçirib: "Sınaqlar hər gün olurdu. Onlar mənə dedilər ki, səni 3 gün yoxlayacağıq. Amma bunun üçün öz evin və qidalanman olmalıdır. Mən isə yalnız yatmaqdan ötrü hər gün 110 km yolu gedib-qayıda bilməzdim. Ona görə də plan qurmalı oldum. Yeganə yolum dəmiryol vağzallarındakı tualetlərdə yatmaq idi. İndi bunu deməkdən utanmıram. Əksinə, fəxr edirəm. Qəbul etdiyim qərar riskli idi. Lakin sonda hədəfimə çatdım və klubla müqavilə bağladım. Ağır, çox soyuq və qorxunc günlər keçirirdim. Lakin nə istədiyimi və nəyin naminə qurban verdiyimi bilirdim".
Çin dilində bəzi sözləri bildiyini deyən Ndlovu bu dili öyrənməyin çətin olduğunu vurğulayıb. O, "Hançjou Qrintaun"a keçənədək Qətər, Rumıniya, BƏƏ və Rusiya klublarından da təklif aldığını açıqlayıb: "Çin klubuna pula görə keçməmişəm. Fərqli mədəniyyəti, fərqli saat qurşağı olan Asiya ölkəsinə getmək, nəyəsə nail olmağa kömək etmək istəyirdim. Pula qalsaydı, Rusiyadan da belə təklif var idi".
"Qarabağ"ın Çempionlar Liqasının qrup mərhələsinə vəsiqə qazandığı vaxt Heydər Əliyev Beynəlxalq Hava Limanında 10 minədək insan tərəfindən qarşılandığını deyən forvardın fikrincə, Ağdam komandası Çempionlar Liqasında oynamasaydı, Avropa Liqasında hər il çıxış edərdi: "Komandanın səviyyəsi bir qədər yüksəkdir. Amma dünyanın hər yerində daha yaxşı çıxış etmək imkanı var. Gənc oyunçulardan ibarət gənc komandaya gəlmişəm. Fikrimcə, yekun hədəfimizə çata biləcəyik".
