"Qarabağ"ın və Azərbaycan milli komandasının baş məşqçisi Qurban Qurbanov "Sumqayıt"ı 2:1 hesabı ilə yendikləri yoxlama matçından sonra brifinq keçirib. Sportnet.az xəbər verir ki, 46 yaşlı mütəxəssis əvvəlcə qarşılaşmanı dəyərləndirib...
- Pis oyun olmadı. Sürətli mübarizə getdi. Samir Abasov da sağ olsun ki, belə bir görüşə razılıq verdi. Hər iki komanda yaxşı, istəkli oyun sərgilədi. Bu məqam da məni razı saldı. Bir sözlə, düşündüyüm proqram alındı.
- Dünən millinin baş məşqçisi idiniz, bu gün isə "Qarabağ"a rəhbərlik edirdiniz. Bu, çətin deyildi?
- Həm orda, həm burda çalışmaqdan dolayı bir qədər yorğunluq olur. Amma çalışırıq ki, bunu doğru-düzgün qaydada yola verək. Dünənki oyundan sonra millinin futbolçularına bu gün axşamadək istirahət vermişdim. Fürsətdən istifadə edərək, gəlib "Qarabağ"ın oyununda iştirak etdim.
- Bu gün "Qarabağ"ın heyətində meydana xeyli sayda gənc çıxdı. Ehtiyat qüvvənin özlərini göstərmələrindən razı qaldınız?
- Bir oyunla fikir yürütmək olmaz. Həmin gənclər son bir ildə daha çox nəzərimizdə olanlardır. Bir il əvvəlki ilə indiki performansları arasında çox fərq var. Yaxşılığa doğru xeyli artıma nail olublar.
- Milliyə namizəd sayılan, lakin müəyyən səbəblərdən uzaq qalan Əfran İsmayılov, Rahid Əmirquliyev kimi futbolçuların vəziyyəti necədir?
- Pis deyillər. Dərk edirlər ki, daha çox öz üzərlərində işləməlidirlər. Bu gün yığmada deyillərsə, o demək deyil ki, bir daha çağırılmayacaqlar. Belarusla qarşılaşmada öz klubunda daha çox çıxış edən oyunçulara üstünlük verdik. Lakin bu, onların milliyə daim çağırılacaqları demək deyil. Elə oyunçular var ki, öz klublarında yüksək rəqabət üzündən oynaya bilmir, lakin öz performanslarını qoruyub saxlayırlar. 2-3 belə futbolçu olacaq ki, klubunda az oynamalarına baxmayaraq, milli üçün faydalılıqlarını nəzərə alaraq, toplanışa çağıraq. Dəyişikliklər, rotasiya həmişə olacaq.
Təbriz QULİYEV
