Futbol üzrə Çempionlar Liqasında son 2 yarımfinalçı müəyyənləşib.
Sportnet.az-ın məlumatına görə, bunlar Almaniyanın "Bavariya" və İspaniyanın "Real Madrid" klublarıdır. Münhen komandası 1/4 final mərhələsində İspaniya "Sevilya"sını mübarizədən kənarlaşdırıb. Cütün taleyi ötən həftə keçirilmiş ilk görüşdə həll olunub. Yupp Haynkesin baş məşqçi olduğu kollektiv səfərdə 2:1 hesablı qələbə qazanıb. Cavab oyunu isə qolsuz bərabərliklə yekunlaşıb - 0:0.
"Real Madrid" isə İtaliya "Yuventus"unu üstələyib. Səfərdəki ilk görüşdə 3:0 hesabı ilə qalib gəlmiş "kral klubu" evində 0:3 hesabı ilə geri düşdüyü vaxt uzatma dəqiqələrində qələbəyə bərabər qolu vurmağa müvəffəq olub. İngiltərəli referi Maykl Oliverin təyin etdiyi penalti Turin komandasının etirazına səbəb olsa da, qərar dəyişməyib. Üstəlik, Canluici Buffon meydandan qovulub. Kriştianu Ronaldu isə penaltini dəqiq yerinə yetirib.
"Bavariya"dan əvvəl İngiltərənin "Liverpul" və İtaliyanın "Roma" klubları da yarımfinala yüksəlib.
Çempionlar Liqası
1/4 final, cavab oyunları
11 aprel
22:45. "Real Madrid” (İspaniya) – "Yuventus” (İtaliya) - 1:3
Qollar: Kriştianu Ronaldu, 90+8 - Mario Mancukiç, 2; 37. Bleyz Matüidi, 61
Qırmızı vərəqə: Canluici Buffon, 90+3 ("Yuventus")
Baş hakim: Maykl Oliver (İngiltərə)
İlk oyun – 3:0
22:45. "Bavariya” (Almaniya) – "Sevilya” (İspaniya) - 0:0
Qırmızı vərəqə: Xoakin Korrea, 90+2 ("Sevilya")
Baş hakim: Uilyam Kollam (Şotlandiya)
İlk oyun – 2:1
Qeyd edək ki, yarımfinal mərhələsinin püşkatma mərasimi aprelin 13-də keçiriləcək.
--------------------------------------
Bu gecə futbol üzrə Çempionlar Liqasında 1/4 final mərhələsinə yekun vurulacaq.
Sportnet.az-ın məlumatına görə, son oyun günündə biri İspaniya digəri isə Almaniyada olmaqla iki oyun baş tutacaq.
İspaniyanın "Real Madrid” klubu doğma azarkeşlər önündə İtaliya "Yuventus”u ilə üz-üzə gələcək. Madrid təmsilçisi İtaliyadakı matçda 3:0 hesabı ilə qələbə qazanıb. Turin klubu bu görüşdə möcüzəni reallaşdırmağa çalışacaq.
Meydan sahibləri qarşılaşmaya ciddi itki ilə çıxacaq. Komandanın əsas müdafiəçisi Serxio Ramos cəzalı olduğuna görə bu oyunda iştirak etməyəcək. Madrid klubunun digər müdafiəçisi Naço zədə səbəbindən görüşü buraxacaq. Lukas Vaskesin isə iştirakı sual altındadır.
Qonaqlara gəldikdə, Paulo Dibala və Rodriqo Bentankur cəzalı, Andrea Bartsalyi isə zədə səbəbindən komandasına kömək edə bilməyəcək.
Günün digər oyununda Almaniyanın "Bavariya” klubu İspaniyanın "Sevilya” komandasını qəbul edəcək. İlk görüşdə səfərdə rəqibini 2:1 hesabı ilə məğlub edən Almaniya təmsilçisi cavab qarşılaşmasına itkilərlə çıxacaq. Manuel Noyer, David Alaba, Arturo Vidal və Kinqsli Koman zədə səbəbindən iştirak etməyəcək.
Qonaqların heyətində isə Simon Kyaer oyunu buraxacaq. Qabriel Merkado, Xoakin Korrea və Sebastyan Korşyanın isə iştirakı bəlli deyil.
