Futbol üzrə Azərbaycan Premyer Liqasında IV tura start verilib.
Sportnet.az xəbər verir ki, Millətlər Liqası ilə əlaqədar ölkə çempionatında yaranmış fasilədən sonra keçirilən açılış matçında "Qarabağ" "Sumqayıt"ı qonaq edib.
"Azərsun Arena"da baş tutan görüş meydan sahiblərinin 1:0 hesablı qələbəsi ilə yekunlaşıb. Ağdam təmsilçisinin yeganə qolunu 21-ci dəqiqədə Filip Ozobiç penaltidən vurub. "Sumqayıt" 70-ci dəqiqədə Yusif Nəbiyevin qırmızı vərəqə alması səbəbindən qalan bölümü 10 futbolçu ilə keçirib. Bu qələbədən sonra xalını 7-ə çatdıran "Qarabağ" lider "Neftçi"yə şərik olub. Hesabında 4 xalı olan "Sumqayıt" isə 5-ci pilləyə enib.
Qeyd edək ki, turun qalan oyunları həftəsonu keçiriləcək. Sentyabrın 15-də "Səbail" "Zirə"ni qəbul edəcək. Ertəsi gün isə "Sabah" - "Qəbələ" və "Neftçi" - "Keşlə" görüşləri olacaq.
----------------------------------------------
Bu gün Topaz Premyer Liqasında IV tura start veriləcək.
Sportnet.az xəbər verir ki, qarşılaşmalar üç günü əhatə edəcək. İlk oyun günündə bir matç keçiriləcək.
"Qarabağ" doğma azarkeş önündə "Sumqayıt"la üz-üzə gələcək. Əslində meydan sahibi qismində "gənclik şəhəri" təmsilçisi çıxış etməli idi. Hətta oyunun məkanı kimi "ASK Arena" da göstərilmişdi. Lakin Ağdam klubu sentyabrın 20-də Avropa Liqasında Portuqaliya "Sportinq"i ilə keçirəcəyi səfər oyunu ərəfəsində süni örtükdə zədə riskindən qorunmaq üçün matçın təbii örtüklü meydanda təşkilinə nail olub. Nəticədə komandaların ilk dövrədə "Azərsun Aren"da, IV dövrədə isə Sumqayıtda üz-üzə gəlmələri məqbul sayılıb.
Bu komandalar Premyer Liqada indiyədək 24 görüşdə üz-üzə gəliblər. 17 matçda meydan sahibləri, 4 oyunda qonaqlar qələbəyə sevinib. 3 qarşılaşma isə heç-heçə başa çatıb. Topların fərqində də Ağdam təmsilçisi öndədir - 50:12. Ölkə çempionu rəqibinə qarşı son 11 oyunda meydanı xalsız və qolsuz tərk etməyib. "Sumqayıt” isə son 5 səfər oyununda məğlub olub.
Qeyd edək ki, turun qalan oyunlarından biri - "Səbil" - "Zirə" qarşılaşması sentyabrın 15-də "Bayıl Arena"da olacaq. Son iki görüş isə sentyabrın 16-da nəzərdə tutulub. "Sabah" komandası "Əlincə Arena"da "Qəbələ"ni, lider "Neftçi" "Keşlə"ni ot örtüyünün təmirindən sonra istifadəyə verilən "Bakcell Arena"da qəbul edəcək.
Topaz Premyer Liqası, IV tur
14 sentyabr (cümə)
20:00. "Qarabağ” – "Sumqayıt” - 1:0
Qol: Filip Ozobiç, 21-p.
Qırmızı vərəqə: Yusif Nəbiyev, 70 ("Sumqayıt")
Hakimlər: İnqilab Məmmədov, Yaşar Abbasov, Rahil Ramazanov, Orxan Məmmədov
AFFA nümayəndəsi: Erkin Hüseynov
Hakim-inspektor: Əhmədağa Cabbarov
"Azersun Arena”
