"Futbolçularımı təbrik edirəm, əzmkar qələbə idi. Bilmirəm bu qələbəni bəxtə bağlamaq olar, ya yox. Oyun başlayanda epzidolarımız var idi. İkinci yarıda rəqibin təzyiqini gözləyirdik. Futbolçularıma, azarkeşlərimizə təşəkkür edirəm. Uduzduğumuz oyundan sonra oyunun üzərində çox dayanmağı xoşlamıram. Rəqibi təbrik edirəm. "Kəpəz"lə oyunda üzərində çox dayanacaq səhvlərimiz də yox idi. Həmin matçdan cəmi 3 epizodu kəsib uşaqlara göstərmişdim. Pis deyildi, bizim problemi bilirəm. "Turan Tovuz"la görüşdə də qələbə qazana bilməməyimizin səbəbini bilirəm. Sadəcə bunu açıqlaya bilmərəm. Rəqiblərə material vermiş olaram. Amma özüm bilirəm. O da komandanın içində baş verən problem deyil. Ehtiyat skamya çox güclü olmalıdır. Problem sırf bunda idi. "Səbail"ə uduzsaydıq, böyük problem olmayacaqdı. Uduzsaydıq, ondan yaxşı tərəfəini çıxarardım. Çünki yeni yaradılan komandanın onurğasını qurmaq istəyirəm. Yeni sezon üçün stabil komanda fikrindəyəm".
Sportnet.az xəbər verir ki, bu sözləri "Sumqayıt"ın baş məşqçisi Samir Abasov Premyer Liqanın XXVI turunun "Səbail"lə oyunundan (1:0) sonra keçirilmiş mətbuat konfransında deyib.
O, daha sonra jurnalistlərin suallarını cavablandırıb:
- Masaki Murataya oyundan sonra hansı epizodu izah edirdiniz?
- Oyuna baş məşqçi tapşırıqları ilə çıxırsan. Futbolçunu inkişaf etdirən məqam rəqib təzyiq göstərəndə verdiyi qərarlardır. Rahat olan vaxtı edirsənsə, təzyiq olanda niyə etmirsən? Bir-iki məsələni ona başa salırdım. Bir az əsəbi idi. Bir-iki oyunda sakit başa salırsan, birində də belə etmək lazımdır. Futbolda normal şeylərdir.
- Vüqar Mustafayevin durumu nə yerdədir?
- Hələ, hazır deyil. Komanda ilə yavaş-yavaş məşq edir. 4-5 dəfə məşqə çıxıb, amma onda da qorumağa çalışmışıq. Ona xeyli vaxt lazımdır.
- Şahin Diniyev "Sumqayıt"ın vaxtı uzatması ilə bağlı narazılıq edirdi. Hətta ilk yarıda bununla bağlı sizə səsləndi...
- Onu eşitmədim. Şahin müəllim nə desə, mənim üçün qəbuldur. Futbolçular udmaq üçün belə edirsə, onları da qınaya bilmərəm. Məsələn, Mehdi Cənnətov topu çıxarmağa yavaş gedirsə, yemək yeməyə də eyni cür gedir. Bu, onun təbiətidir. Şahin Diniyev deyirsə, görübsə, üzrlü hesab etsin.
- Futbolçularınız son nöqtəni qoymaqda çətinlik çəkirlər. Bu nə ilə bağlıdır?
- Səbəblər müxtəlifdir. Həmin vəziyyətdə onlar nə hiss edirlər? Mənim üçün nəsə demək çətindir. Məşqlərdə belə olmur. Məşqlərdə vəziyyət köhnə millimiz kimidir. Rahat oynayıb, udurduq. Nə deyim? Həmin epizodlardan 1-2-ni də vursaydıq, mən də rahat oturardım yerimdə.
- İkinci yeri tutub avrokuboklara getsəniz, komandanın özəyini qura biləcəksiniz?
- Bu, bir il içərisində olan proses deyil. Bu qədər legionerimiz var və hamısı yüksək səviyyədədir deyə bilmərik. Seçilirlər, yerlilər gəlir, digərləri gəlir. Bir komandanın formalaşması üçün uzun müddət lazımdır. Xaricdə baş məşqçilərlə 3-4 illik müqavilə imzalanır. O isə deyir ki, bunu 4 ildən sonra edə bilərəm. Biz bunu öyrənməliyik. Bu il nə oldu ki, çıxıb avrokuboklarda qruplara düşək? Bu gün "Səbail" təzyiq etdi, öz oyunumuzdan çıxdıq. Bu qədər təzyiqləri nə qədər yaşamalıyıq, mən də baş məşqçi kimi sezməliyəm ki, hansı futbolçu belə durumda özünü rahat hiss edəcək. Komanda belə-belə formalaşmalıdır. Hər uduzduğumuz oyundan nəticə çıxaracağıq. Udduğumuz oyun da bizə xoş motivasiya olacaq.
- "Sumqayıt"da qalaraq Qurban Qurbanovun "Qarabağ"da etdiyinini ən azından 1/3-ni etmək fikriniz var?
- O da yalnış düşüncədir. Çünki tək baş məşqçiyə aid olmayan məsələdir. Mən bayaq onurğadan danışdım. Bu gün "Sumqayıt"ın futbolçuları digər pullu komandalar üçün yemdir. Yaxşı mənada. Əgər mən istədiyim oyunçunu saxlaya bilməyəcəmsə, hansı onurğadan söhbət gedə bilər? Əfsuslar olsun, üzücü məqam odur ki, hər şeyi baş məşqçi etməlidir. Mən tək olaraq bu işi bacarmaram. Nəinki mən, heç kim bacarmaz. Azərbaycanda bizim üçün "Qarabağ" örnəkdir. Digər ölkələrdə də belə örnək var. Amma uzağa getmək lazım deyil, "Qarabağ" bizim üçün əsl nümunədir. Lakin tək etmək olmur.
- Son vaxtlar indiki və əvvəlki millidən hansının güclü olması müzakirə edilir. Maraqlıdır, siz necə düşünürsünüz?
- Bu söhbət uzansa, gərək burada çox oturaq. Bu məsələ ilə bağlı sizə şəxsən müsahibə verə bilərəm. Kiminlə oturub danışmışam, indiki millidəkilərin hamısının məndən yaxşı futbolçu olduğunu demişəm. İndiki dayaq yarımmüdafiəçiləri bizim vaxtımızda oynaya bilərdi? Bu artıq sualdır. O qədər qaçmaq, o qədər mübarizə aparmaq. Belə suallar var. Ən yaxşı qapıçı Kamran Ağayevi, sağ müdafiəçi Mahir Şükürovu, mərkəz müdafiəçisi Rəşad Sadıqovu deyirlər. Mənim üçün ən güclü dayaq yarımmüdafiəçisi Emin Quliyev olub. Zaur Ramazanov, Zaur Tağızadə, Mahmud Qurbanov, Samir Əliyev kimi futbolçularımız var. Belə baxırsan, ən çoxu bizim futbolçu nəslindən seçilir. Bilmirəm, necə və nə ilə indikini müqayisə edirik? O vaxt biz ömür boyu müdafiədə oturmalıydıq. Berti Foqtsdan əvvəl də elə idi. Az qol buraxırdıq və o, bizim üçün artıq nəticə idi. Biz də futbolçular olaraq köklənirdik ki, nə badə qol vursunlar. İllər keçdi, internet dövrüdür, gördük ki, biz də oynaya bilərik. Heç kim inciməsin, özümü çıxıram, mənim dövrümdə olan və bayaq adını çəkdiyim futbolçular indiki millidə top səviyyədə olardılar. İndikilər bu ruhla bizim millidə olardılar? Bu da sualdır.
- Renat Dadaşov, yoxsa Vaqif Cavadov?
- Branimir Subaşiç, Samir Əliyev, Zaur Ramazanov, Vaqif Cavadov, Fərrux İsmayılov, onlardan sonra Renat Dadaşov.
- AFFA-dakı seçkilərdən sonra futbolumuzun inkişaf edəcəyini düşünürsünüz?
- Uğursuz gedən komandaya yeni baş məşqçi gətirirsənsə, orada dərhal yaxşılığa doğru nəsə sezilir. Rəhbərlik və oyunçular da canlanır.