Daha öncə itmələri barədə məlumat verilmiş Somali idmançıları bu gün vətənlərinə yola salınıblar.
Sportnet.az xəbər verir ki, bu barədə Daxili Işlər Nazirliyindən məlumat verilib.
Bildirilib ki, Somali idmançıları yarışların bitməsindən dərhal sonra Azərbaycan rayonlarından birinə yollanmağa və orada istirahət etməyə qərar veriblər.
Nəticədə idmançılar reyslərinə gecikiblər və ölkələrinin nümayəndə heyəti ilə birlikdə vətənlərinə qayıda bilməyiblər.
Lakin artıq bu gün DİN əməkdaşlarının müşayiəti ilə onlar hava limanına yola salınıb və oradan vətənlərinə yola düşüblər ("virtualaz.org).
-----------------------------------------------
"Bakı 2017" IV İslam Həmrəyliyi Oyunlarında iştirak etmiş Somalidən olan idmançılar axtarışa verilib. Sportnet.az "Sputnik Azərbaycan"a istinadən xəbər verir ki, Somali Federativ Respublikasının iki vətəndaşı öz yığmaları ilə birlikdə vətənə qayıtmayaraq Azərbaycanda qalıblar.
Hüquq-mühafizə orqanlarındakı mənbənin dediyinə görə, onların dəqiq harada olması ilə bağlı heç bir məlumat yoxdur. Axtarılan idmançıların adları hələ açıqlanmır. Yalnız bu idmançıların atletlər olduqları məlumdur.
Qeyd edək ki, Somalidən olan nümayəndə heyətinin sayı az olub - cəmi 8 idmançı. Məlumdur ki, 800 metrlik məsafəyə qaçışda Somalidən olan idmançı Əhməd Adissalam iştirak edib və 12-ci yeri tutub. 1500 metr məsafəyə qaçışda isə Həssən Əli 16-cı yeri tutub. Ancaq məhz bu idmançıların geri qayıtmadığı dəqiq bəlli deyil.
Eyni zamanda, Azərbaycanın Daxili İşlər Nazirliyindən bildiriblər ki, gec-tez idmançılar tapılacaq və öz ölkələrinə deportasiya ediləcəklər. Güman edilir ki, əcnəbilər Azərbaycan vasitəsilə üçüncü ölkəyə getmək üçün burada qalıblar.
Somalidən olan atletlərin yoxa çıxması ilə bağlı Dövlət Miqrasiya Xidmətinin əməkdaşları xəbərdar ediliblər.
