"İdman Azərbaycan" telekanalında "Qəbələ"nin Yunanıstan "Panatinaikos"u ilə Avropa Liqasının ilk "pley-off" matçının canlı yayımlanacağına dair anonsunda maraqlı məqam ortaya çıxıb. Sportnet.az-ın məlumatına görə, video-anonsa "Qəbələ"nin hazırda həbsdə olan kapitanı Cavid Hüseynovun heç bir görüntüsü daxil edilməyib.
Görüntülərdə "Qəbələ"ni meydana çıxaran futbolçu qismində o yox, Rəşad Sadiqov göstərilib. Əvvəlki mərhələlərdə 3 dəfə fərqlənməsinə rəğmən, Hüseynovun heç bir qolu süjetə salınmayıb. Bu halın təsadüfi, bilərəkdən, yoxsa Hüseynovun bugünkü qarşılaşmada oynamayacağı səbəbindən baş verdiyi məlum deyil.
Qeyd edək ki, Cavid Hüseynov barəsində jurnalist Rasim Əliyevin döyülərək, öldürülməsi faktı ilə əlaqədar 3 aylıq həbs qətimkan tədbiri seçilib. O, bibisioğlu Elşən İsmayılov tərəfindən yaradılan qrupun törətdiyi cinayət barədə xəbər verməməkdə şübhəli bilinir.
