Azərbaycan yığmasına Avropa çempionatında qızıl medal qazandırmış sərbəst güləşçi Ruslan Dibirhacıyev Dağıstan Respublikasının ən yaxşı legioneri sayılıb. Sportnet.az-ın məlumatına görə, bu barədə "Dagestanskaya Pravda" qəzetinin ötən illə bağlı hazırladığı hesabatda bildirilir.
Qəzet yazır ki, dağıstanlı legionerlər arasında ən yaxşı nəticəni məhz Dibirhacıyev qazanıb. Ənvər Məhəmmədhacıyevin yetirməsi karyerasında ən böyük uğura böyüklər arasında Avropa çempionu olmaqla qovuşub.
Qeyd edək ki, Ruslan Dibirhacıyev 2014-cü ilin aprelində Finlandiyanın Vantaa şəhərində keçirilmiş Avropa çempionatında sərbəst güləş üzrə 70 kq çəki dərəcəsində qızıl medal qazanıb. 26 yaşlı pəhləvan finalda Ermənistan təmsilçisi Qriqor Qriqoryanı məğlub edib.
