Bakının "İnter" futbol komandası ilə yollarını ayıran qapıçı Səlahət Ağayevin yeni klubu müəyyənləşib. Sportnet.az-ın məlumatına görə, 25 yaşlı qolkiper "Qəbələ"yə keçib.
Azərbaycan milli komandasının üzvü ilə 1.5 illik müqavilə imzalanıb. Razılaşmaya əsasən, Ağayev "qırmızı-qaralar"ın heyətində ilinə 80 min dollar qazanacaq. Artıq o, Türkiyənin Antalya bölgəsində keçirilən təlim-məşq toplanışına qatılıb. Bunu "Qəbələ"nin rəsmi saytının təqdim etdiyi görüntülər də sübuta yetirir.
Qeyd edək ki, Səlahət Ağayev karyerası ərzində MOİK və "Sumqayıt"ın da formasını geyinib. O, maddi məsələlərdə anlaşa bilmədiyi üçün "İnter"lə müqaviləsini uzatmayıb. (Report.az)
