Albaniyanın paytaxtı Tiranada güləş üzrə Avropa çempionatına start verilib.
Sportnet.az-ın məlumatına görə, ilk yarış günündə 55 kq, 63 kq, 77 kq, 87 kq və 130 kq-da çıxış edən yunan-Roma güləşçiləri mübarizə aparıb.
Azərbaycan təmsilçilərindən Rəşad Məmmədov (55 kq) 1/4 finalda rusiyalı Avropa çempionu və dünya mükafatçısı Emin Seferşayevə 0:3 hesabı ilə məğlub olub. Rəqib finala yüksəldiyi üçün Məmmədov aprelin 21-də bürünc medal uğrunda güləşəcək. Rəqib türkiyəli Ömər Rəcəp olacaq.
Ziya Babaşov (63 kq) debütdə türkiyəli 2 qat Avropa çempionu Kərəm Kamala uduzub – 0:8.
Sənan Süleymanov (77 kq) belaruslu Şuay Mamedovu vaxtından əvvəl mübarizədən kənarlaşdırıb – 9:0. Lakin o, 1/4 finalda macarıstanlı Robert Fritşə minimal fərqlə məğlub olub – 5:6.
İslam Abbasov (87 kq) polşalı Arkadiuş Kuliniçlə (3:1) norveçli Eksos Mukubuya (4:3) qalib gələrək yarımfinala yüksəlib. Finalın bir addımlığında bolqarıstanlı Semyon Novikova məğlub olan (0:4) Abbasov sabah bürünc medal uğrunda güləşəcək. Rəqib Valtteri Latvala (Finlandiya), Maryan Kola (Albaniya) və ya Doğan Kaya (Türkiyə) olacaq.
Beka Kandelaki (130 kq) albaniyalı Qriseldi Kodraya tam üstünlüklə (11:0), almaniyalı Yello Krahmerə isə minimal fərqlə (3:2) qalib gələrək yarımfinala adını yazdırıb. Macarıstanlı Dariuş Vitekə ilk xal prinsipinə əsasən (1:1) məğlub olan Kandelaki sabah bürünc medal uğrunda güləşəcək. Rəqib Sulxan Buidze (Gürcüstan) – Mixaylo Vişnivetski (Ukrayna) qarşılaşmasının qalibi olacaq.
