"Bakı 2015" I Avropa Oyunlarında gümüş medal qazanmış Azərbaycan boksçusu Xaybula Musalov karyerasını başa vurub. Sportnet.az-ın məlumatına görə, bu barədə federasiyanın icraçı direktoru Nağı Səfərov bildirib.
N.Səfərovun sözlərinə görə, 26 yaşlı idmançının qərarına zədəsi səbəb olub: "Musalov Avropa Oyunlarından sonra təlim-məşq toplanışında gözündən zədə almışdı. Bir müddət həkim nəzarətində olsa da, həkimlər onun döyüşməsinə icazə vermədilər. Bu səbəbdən, Xaybula karyerasını bitirməli oldu".
Qeyd edək ki, Xaybula Musalov "Bakı 2015" I Avropa Oyunlarında 75 kq çəki dərəcəsində gümüş medal qazanıb. Hələlik Azərbaycan yığması bu çəkidə 2016-cı il Rio-de-Janeyro Yay Olimpiya Oyunlarına lisenziya əldə edə bilməyib. (Report)
