Qazaxıstanın paytaxtı Nur-Sultanda keçirilən dünya çempionatında bu gün daha 4 çəki dərəcəsində qadın güləşçilər mübarizəyə başlayıblar.
Sportnet.az xəbər verir ki, Azərbaycan bu çəkilərin hamısında təmsil olunub.
57 kq-da Avropa çempionatlarının üçqat və "Minsk 2019" II Avropa Oyunlarının bürünc mükafatçısı Alyona Kolesnik çıxış edib. Onun təsnifat mərhələsinə təsadüf edən ilk görüşdə rəqibi ukraynalı İrina Çixradze olub. Görüş Kolesnikin vaxtından əvvəl təmiz qələbəsi ilə yekunlaşıb - 5:0. Lakin növbəti görüşündə o, KXDR təmsilçisi İn Sun Yonqa vaxtından əvvəl uduzub. Yonq finaladək irəliləyə bilmədiyi üçün Kolesnik mübarizəni dayandırıb.
59 kq-da "Bakı 2017" IV İslam Həmrəyliyi Oyunlarının qalibi və Avropa çempionatının bürünc medalçısı Tatyana Omelçenko təsnifat mərhələsində yeni zelandiyalı Ana Paulin Moseyevanı vaxtından əvvəl məğlubiyyətə uğradıb. 1/8 finalda vyetnamlı Ti Huonq Daonu 10:2 hesabı ilə üstələyən Omelçenko növbəti görüşündə kanadalı Linda Moraisə uduzub - 4:6. Lakin Morais finala vəsiqə qazandığı üçün Omelçenko təsəlliverici görüşdə iştirak hüququ əldə edib.
65 kq-da son Avropa çempionu və Bakıdakı islamiadanın qalibi Elis Manolova 1/8 finalda hindistanlı Kaur Navcotu, 1/4 finalda isə Kadriye Aksoyu tuşe ilə yenib. 1/4 finalda Manolovanın rəqibi rusiyalı İnna Trajukova olub. Bu dəfə Trajukova 6:4 hesabı ilə qalib gəlib. Manolova sabah bürünc medal görüşünə çıxacaq.
76 kq-da isə gənclər arasında Avropa çempionu, böyüklər arasında isə Avropa çempionatının bürünc, islamiadanın gümüş mükafatçısı Səbirə Əliyeva təsnifat mərhələsində cənubi koreyalı Eunju Hvanqla görüşüb. Qarşılaşma Əliyevanın qələbəsi ilə yekunlaşıb - 5:2. 1/8 finalda rəqib almaniyalı dünya çempionu Aline Rotter Fokken olub. Bu dəfə Fokken vaxtından əvvəl tam üstünlüklə qalib gəlib. Lakin almaniyalı pəhləvan finaladək irəliləyə bilmədiyi üçün Əliyeva da təsəlliverici görüşsüz və lisenziyasız qalıb.
Dünya çempionatı
18 sentyabr
57 kq
1/8 final. Alyona Kolesnik - İn Sun Yonq (KXDR) - 0:11 (vaxtından əvvəl)
Təsnifat. Alyona Kolesnik - İrina Çixradze (Ukrayna) - 5:0 (vaxtından əvvəl təmiz qələbə)
59 kq
Təsəlliverici görüş. Tatyana Omelçenko
1/4 final. Tatyana Omelçenko - Linda Morais (Kanada) - 4:6
1/8 final. Tatyana Omelçenko - Ti Huonq Dao (Vyetnam) - 10:2
Təsnifat. Tatyana Omelçenko - Ana Paulin Moseyava (Yeni Zelandiya) - 6:0 (təmiz qələbə)
65 kq
Bürünc medal görüşü: Elis Manolova
1/2 final. Elis Manolova - İnna Trajukova (Rusiya) - 4:6
1/4 final. Elis Manolova - Kadriye Aksoy - 5:0 (tuşe)
1/8 final. Elis Manolova - Kaur Navyot (Hindistan) - 5:0 (tuşe)
76 kq
1/8 final. Səbirə Əliyeva - Aline Rotter Fokken (Almaniya) - 0:11 (vaxtından əvvəl)
Təsnifat mərhələsi. Səbirə Əliyeva - Eunyu Hvanq (Cənubi Koreya) - 5:2
Qeyd edək ki, bu çəkilərdən 57 kq və 76 kq-da yarımfinaladək və ya son təsəlliverici görüşədək irəliləyənlər 2020-ci il Tokio Yay Olimpiya Oyunlarına lisenziya qazanırlar. 59 kq və 65 kq isə qeyri-olimpiya çəkiləridir.
Bu gün həm də Mariya Stadnik 50 kq çəki dərəcəsində final görüşünə çıxacaq. Onun rəqibi dünya və Avropa çempionatlarının mükafatçısı, rumıniyalı Emilia Alina Vuç olacaq.
