Qadın futbolçulardan ibarət Azərbaycan yığması UEFA Millətlər Liqasında ikinci oyununu keçirib.
Sportnet.az xəbər verir ki, C Liqasının 4-cü qrupunda yer alan milli Vilnüsdə Litva yığmasının qonağı olub.
”Jalgiris” stadionunda təşkil olunan qarşılaşma Azərbaycan seçməsinin 2:0 hesablı qələbəsi ilə yekunlaşıb. Yığmanın heyətində qolları 21-ci dəqiqədə Esra Manya və 55-ci dəqiqədə Nigar Mirzəliyeva vurub.
42-ci dəqiqədə Azərbaycan millisinin baş məşqçisi Siyasət Əsgərov iki komandanın futbolçuları arasında baş verən gərginliyi aradan qaldırmaq üçün meydana daxil olub. Avstriyalı baş hakim Marina Zexner Əsgərova birbaşa qırmızı vərəqə göstərərək, onu texniki zonadan kənarlaşdırıb.
İlk turda Monteneqro seçməsi ilə qolsuz heç-heçə edən yığma bu qələbə sayəsində xal sayını 4-ə çatdırıb və qrupda liderliyi ələ alıb.
Qeyd edək ki, Azərbaycan milli komandası növbəti matçını aprelin 8-də səfərdə Monteneqro yığmasına qarşı keçirəcək.
4 aprel
19:30. Litva (Qadınlar) - Azərbaycan (Qadınlar) - 0:2
Qollar: Esra Manya, 21. Nigar Mirzəliyeva, 55
Qırmızı vərəqə: Siyasət Əsgərov, 42 (Azərbaycan)
Baş hakim: Marina Zexner
Baş hakimin köməkçiləri: Biljana Iskin, Linda Thieme
Dördüncü hakim: Lena Hirtl
(Hakimlər briqadası Avstriyadandır)
"Jalgiris stadionu".
Qeyd edək ki, Azərbaycan millisi ilk turda Bakıda Monteneqro ilə heç-heçə edib - 0:0. Monteneqro isə öz meydanında Litvaya qalib gəlib - 3:1.
