"Futbolçularımız ilk hissədə dediyim plana uyğun yaxşı oyun sərgilədilər. İkinci yarıda bir az yorğunluq hiss olundu. "Qarabağ"ın əvəzetmələrindən sonra daha çox güc sərf etdik. Amma buna rəğmən komandam yaxşı oyun göstərdi. Məğlub olmamağa çalışırdıq. Amma bu da futbolun bir hissəsidir. "Qarabağ"ı təbrik edirəm. Oyunu təhlil edəcəyik. Qarşıda matçlar var. Həmin görüşlərə çox ciddi hazırlaşacağıq".
Sportnet.az xəbər verir ki, bunu "Karvan-Yevlax"ın baş məşqçisi Füzuli Məmmədov səfərdə "Qarabağ"a 0:2 hesabı ilə uduzduqları Azərbaycan Premyer Liqasının XIII tur matçından sonra mətbuat konfransında deyib.
Daha sonra 48 yaşlı mütəxəssis jurnalistlərin suallarını cavablandırıb:
- Rəsmi olaraq baş məşqçi kimi təyinatınız açıqlanmayıb. Bu, qeyri-peşəkarlıq deyil?
- Yaxın zamanda bunlar hamısı öz həllini tapacaq.
- Ötən mövsüm I Liqada 10-cu yerdə gedən "Mingəçevir"i 4-cü pilləyə qaldırdız. "Karvan-Yevlax"da bu perspektivi görürsünüz?
- Komandanın heyətində çox yaxşı futbolçular var. Sadəcə, onlarda istədiyimiz performans yoxdur. Futbolçuların fiziki durumunu yüksəltməyə çalışacağıq. Bunun üçün zaman lazımdır. Hər oyun bizim üçün önəmlidir. Oyundan-oyuna komandamız daha da yaxşı olacaq.
- 5 il əvvəl Premyer Liqada çalışmısınız. Bu müddətdə çempionatda nə dəyişib?
- "Qarabağ" həmişə yaxşı komanda olub. Onlara uğurlar arzulayıram. Ovaxtkı "Qarabağ"la indiki arasında fərq böyükdür. Çempionata gəldikdə, sürət artıb, heyətlər daha güclüdür.
